ଢେଙ୍କାନାଳ: ଜଙ୍ଗଲ କ୍ଷୟ ବୃଦ୍ଧି ପାଉଥିବାରୁ ଜନବସତି ମୁହାଁ ହେଉଛନ୍ତି ବନ୍ୟଜନ୍ତୁ । ଯାହା ଫଳରେ ମଣିଷ ହାତୀ ମୁହାଁମୁହିଁ ହେଉଛନ୍ତି । କେତେବେଳେ ହାତୀର ଜୀବନ ଯାଉଛି ତ ଆଉ କେତେବେଳେ ମଣିଷର । ଏଭଳି ଏକ ଘଟଣା ଦେଖିବାକୁ ମିଳିଛି ଢେଙ୍କାନାଳ ବନଖଣ୍ଡର ହିନ୍ଦୋଳ ବନାଞ୍ଚଳରେ । ହାତୀ ମଣିଷ ଲଢେଇରେ ଜଣଙ୍କର ମୃତ୍ୟୁ ହୋଇଛି । ମୃତକ ଜଣକ ହେଲେ କାଠକୁମ୍ପାର ବାଜିଆ ବାରିକ ।
ସୂଚନା ଅନୁସାରେ, ହିନ୍ଦୋଳ ବନାଞ୍ଚଳରେ ହାତୀ ଦାଉରୁ ଧାନ ଫସଲ ସୁରକ୍ଷିତ ରଖିବା ପାଇଁ କ୍ଷେତ ଚାରିପଟେ ସୋଲାର ଫେନ୍ସିଂ ଲଗାଯାଇଥିଲା । ହେଲେ ସୋଲାର ଫେନ୍ସିଂକୁ ମାଡି କ୍ଷେତ ମଧ୍ୟକୁ ପଶି ଯାଇଥିଲେ ହାତୀ ପଲ । ଆଉ ଏହି ହାତୀପଲଙ୍କୁ ଘଉଡାଇବା ପାଇଁ କନ୍ଧରା ସେକ୍ସନର କାଠକୁମ୍ପା ଗାଁଲୋକେ ଉଦ୍ୟମ କରିଥିଲେ । ହେଲେ ଏଥିରେ ବିଫଳ ହୋଇଥିଲେ । ଫଳରେ ଜଣେ ବ୍ୟକ୍ତିଙ୍କୁ ହାତୀ ପାଦରେ ଦଳି ଦେଇଥିଲା । ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଘଟଣାସ୍ଥଳରେ ହାତୀପଲ ଜଗି ରହିଥିବାରୁ ବନ ବିଭାଗ ପହଞ୍ଚି ହାତୀ ମାନଙ୍କୁ ଘଉଡ଼ାଇଥିଲା । ଏହାସହ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ମେଡିକାଲକୁ ପଠାଇ ଥିଲା ବୋଲି ଜଣାପଡିଛି ।
ଇଟିଭି ଭାରତ, ଢେଙ୍କାନାଳ
