ଢେଙ୍କାନାଳ: ଦୁର୍ଘଟଣା ଘଟାଇଥିବା କାର ଚାଳକଙ୍କ ମୃତ୍ୟୁକୁ ନେଇ ଢେଙ୍କାନାଳ ହିନ୍ଦୋଳରେ ଉତ୍ତେଜନା । ଗାଡି ଚାଳକ ସଂଘ ପକ୍ଷରୁ ମୃତଦେହ ରଖି ହିନ୍ଦୋଳ ଏନଏସି ମୁଖ୍ୟରାସ୍ତା ଅବରୋଧ । କାର ଚାଳକଙ୍କୁ ପିଟି ପିଟି ହତ୍ୟା କରିଥିବା ଅଭିଯୁକ୍ତମାନଙ୍କୁ ଗିରଫ ଦାବି କଲା ସଂଘ । ଦୁର୍ଘଟଣାରେ ଦୁଇ ଜଣ ବ୍ଯକ୍ତି ଗୁରୁତର ଆହତ ହେବାରୁ ସମ୍ପୃକ୍ତ କାର୍ ଚାଳକଙ୍କୁ ହତ୍ୟା କରାଯାଇଥିବା ଅଭିଯୋଗ ।
ବୁଝାସୁଝା ପରେ ମୃତଦେହକୁ ବ୍ୟବଚ୍ଛେଦ ପାଇଁ ଛାଡିଥିଲେ ମଧ୍ୟ ଡ୍ରାଇଭରମାନେ ଆନ୍ଦୋଳନରେ ବସିଥିବା ସୂଚନା ମିଳିଛି । ମୃତ କାର ଚାଳକ ହିନ୍ଦୋଳ ବିଜ୍ଞାପିତ ପରିଷଦ ଅଞ୍ଚଳ ବନମାଳିପୁରର ଦେବୀ ପ୍ରସାଦ ମୁଦୁଲି ବୋଲି ଜଣାପଡିଛି । ଗତକାଲି ରାତିରେ ଦେବୀ ପ୍ରସାଦ ମୁଦୁଲି ଚଳାଉଥିବା ଏକ କାର ହିନ୍ଦୋଳ ବିଜ୍ଞାପିତ ପରିଷଦ ମୁଖ୍ୟ ରାସ୍ତା ପାର୍ଶ୍ଵରେ ଥିବା ମିରା ବଜାରର ଗୋଲାପ ମହମ୍ମଦଙ୍କ ଘରେ ଉପରେ ମାଡି ଯାଇଥିଲା । ଦୁର୍ଘଟଣାରେ ଦୁଇଜଣ ଗୁରୁତର ହୋଇଥିଲେ । ତେବେ ଏହି ଘଟଣାରେ ଆହତମାନଙ୍କ ପରିବାର ଓ ସାହି ପଡିଶା ଉତ୍ତେଜିତ ହୋଇଥିଲେ ।
ଏପରିକି ଏହି ଦୁର୍ଘଟଣା ଘଟାଇଥିବା କାର ଚାଳକଙ୍କୁ କୁଆଡେ ନିସ୍ତୁକ ମାଡ଼ ମାରିଥିବାରୁ ତାଙ୍କୁ ମଧ୍ୟ ଗୁରୁତର ଅବସ୍ଥାରେ ହିନ୍ଦୋଳ ଡାକ୍ତରଖାନାରେ ଭର୍ତ୍ତି କରିଥିଲେ । ମାତ୍ର ପରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି । ମୃତ ଗାଡି ଚାଳକଙ୍କ ପରିବାରକୁ ନ୍ୟାୟ ପ୍ରଦାନ ସହ ଅଭିଯୁକ୍ତମାନଙ୍କୁ ତୁରନ୍ତ ଗିରଫ ଦାବିରେ ଅଡ଼ି ବସିଛନ୍ତି ଆନ୍ଦୋଳନରତ ଡ୍ରାଇଭର ।
ଇଟିଭି ଭାରତ, ଢେଙ୍କାନାଳ
