ଢେଙ୍କାନାଳ: ଢେଙ୍କାନାଳ ମୁଖ୍ୟ ଡାକ୍ତରଖାନା ଆଉଟ ଡୋର ସମ୍ମୁଖରେ କୋଭିଡ ପଜିଟିଭଙ୍କ ମୃତ୍ୟୁ ଘଟଣା । ଏହି ଘଟଣାକୁ ନେଇ ଆକ୍ସନ ମୁଡରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ । ସିଡିଏମଓ ଏହାର ତଦନ୍ତ ରିପୋର୍ଟ ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି । କୋଭିଡ ଚିକିତ୍ସା ପାଇଁ ମୁଖ୍ୟ ଡାକ୍ତରଖାନା ପରିସରରେ ସ୍ବତନ୍ତ୍ର ସେଲ ଖୋଲା ଯାଇଛି । ସେଲରେ ଥିବା ଡାକ୍ତରଙ୍କ ଚିକିତ୍ସା ଅବହେଳାରୁ ତାଙ୍କର ମୃତ୍ୟୁ ହୋଇଥିବା ସ୍ପଷ୍ଟ ଭାବେ ରିପୋର୍ଟରେ ଦର୍ଶାଯାଇଛି । ଦାୟିତ୍ବରେ ଥିବା ଡାକ୍ତର ଜଣେ ଆୟୁଷ ଡାକ୍ତର ବୋଲି ଜଣାପଡିଛି ।
ମଙ୍ଗଳବାର ମୁଖ୍ୟ ଚିକିତ୍ସାଳୟକୁ କୋଭିଡ ପରୀକ୍ଷା ପାଇଁ ଆସିଥିବା ଜଣେ ସରକାରୀ କର୍ମଚାରୀ ପଜେଟିଭ ଚିହ୍ନଟ ପରେ ହଠାତ ଚେତାଶୂନ୍ୟ ହୋଇ ପଡିଥିଲେ । ମୁଖ୍ୟ ଡାକ୍ତରଖାନା ଆଉଟ ଡୋର ସମ୍ମୁଖରେ ପଡି ରହିଥିବାବେଳେ ତାଙ୍କ ପାଖରେ ଥିବା ତାଙ୍କ ସମ୍ପର୍କୀୟ ଓ ପତ୍ନୀ ନେହୁରା ହୋଇ ଡାକ୍ତର ଓ କର୍ମଚାରୀମାନଙ୍କୁ କାକୁତି ମିନତି ହୋଇ ଡାକିଥିଲେ । ମାତ୍ର ତାଙ୍କ କରୁଣ ନିବେଦନ କେହି ଶୁଣିନଥିଲେ । ପାଲଟା ଡୋର ବନ୍ଦ କରିଦେଇଥିଲେ । ଶେଷରେ ଯନ୍ତ୍ରଣାରେ ଛଟ ପଟ ହୋଇ ବ୍ୟକ୍ତି ଜଣଙ୍କ ଡାକ୍ତରଖାନା ଆଉଟ ଡୋର ଆଗରେ ପଡି ପ୍ରାଣ ହାରିଥିଲେ ବୋଲି ମୃତକଙ୍କ ପରିବାର ଲୋକେ ଅଭିଯୋଗ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
