ଢେଙ୍କାନାଳ: ଭୁବନ ବିଜ୍ଞାପିତ ଅଞ୍ଚଳ ପରିଷଦ ଦିନକୁ ଦିନ ବିଭିନ୍ନ ସମସ୍ୟାରେ ଘେରରେ ଛନ୍ଦି ହେଉଥିବା ଦର୍ଶାଇ ବିଜେପି ପକ୍ଷରୁ ଏକ ଦାବିପତ୍ର ଦିଆଯାଇଛି । ଏହି ଦାବିପତ୍ରରେ କେନ୍ଦ୍ର ସରକାରଙ୍କ ଯୋଜନାରେ ସ୍ବଚ୍ଛ ଭାରତ ମିଶନ ଦେୟମୁକ୍ତ ଥିବାବେଳେ ଏଠାରେ ଅଳିଆ ଉଠାଇନେବା ନିମନ୍ତେ ରାଜ୍ୟ ସରକାରଙ୍କ ଦେୟଯୁକ୍ତ ଟିକସ ଆଦାୟକୁ ବିଜେପି ନିନ୍ଦା କରିଛି । କରୋନା କାଳରେ ଆକାଶଛୁଆଁ ଦରଦାମ ବେଳେ ଏହି ଟିକସ ଜନବିରୋଧୀ ବୋଲି କହିଛି ବିଜେପି । ଏଥିସହିତ ପାନୀୟଜଳ,ବିଦ୍ୟୁତ,ରାସ୍ତାଘାଟ ଓ ପରିଚ୍ଛନତା ବ୍ୟବସ୍ଥା ସୁଚାରୁରୂପେ ହେଉ ନଥିବା ବିଜେପି କହିଛି ।
ନିର୍ମାଣ ହୋଇଥିବା ଶୌଚାଳୟ ଗୁଡିକରେ ବର୍ଷ ବର୍ଷ ଧରି ତାଲା ଝୁଲୁଥିବାରୁ,ଏହା କାହା ସ୍ବାର୍ଥରେ ବୋଲି ବିଜେପି ପକ୍ଷରୁ ପ୍ରଶ୍ନ କରାଯାଇଛି । ଏ ସଂକ୍ରାନ୍ତ ଏକ ଦାବିପତ୍ର ଏନଏସି ନିର୍ବାହୀ ଅଧିକାରୀଙ୍କୁ ପ୍ରଦାନ କରାଯାଇଛି । ତେବେ ଏହି ସମସ୍ୟା ଗୁଡିକର ସମାଧାନ ନହେଲେ ଆଗାମୀ ଦିନରେ ଏହାକୁ ନେଇ ରାଜରାସ୍ତାକୁ ଓହ୍ଲାଇବ ବୋଲି ବିଜେପି ଚେତାବନୀ ଦେଇଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
