ଢେଙ୍କାନାଳ: ରେଙ୍ଗାଲି କେନାଲରୁ ଏକ ମୃତଦେହ ଉଦ୍ଧାର । ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ଇନ୍ଦିପୁର ପାଖ ଦେଇ ଯାଇଥିବା ରେଙ୍ଗାଲି ଦକ୍ଷିଣ ପାର୍ଶ୍ବ କେନାଲରୁ ମଙ୍ଗଳବାର ଜଣେ ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଛି । ମୃତକ ଜଣକ ଗୋବିନ୍ଦପୁର ଫାଣ୍ଡି ଅନ୍ତର୍ଗତ ତାଳବରକୋଟି ପଟନାସାହିର ରାଧୁ ନାୟକ ବୋଲି ଜଣାପଡିଛି ।
କେନାଲରୁ ମୃତଦେହ ଉଦ୍ଧାର
ମଙ୍ଗଳବାର କେନାଲରେ ଏକ ମୃତଦେହ ଭାସୁଥିବାର ସ୍ଥାନୀୟ ଲୋକେ ଦେଖିଥିଲେ । ଏନେଇ ସେମାନେ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଦମକଳ ବାହିନୀର ସହାୟତାରେ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଏହାସହ ଘଟଣାର ତଦନ୍ତ ଚଳାଇଛି ।
ସୂଚନା ଅନୁଯାୟୀ, ମୃତକ ରାଧୁ ଗତକାଲି(ସୋମବାର) ଠାରୁ ତାଙ୍କ ଭଉଣୀ ଘର ସ୍ଥାନୀୟ ବେଶାଳିଆ ଗ୍ରାମକୁ ଆସିଥିଲେ । ରାତିରେ ପାଖ କେନାଲକୁ ଶୌଚ ପାଇଁ ଯାଇଥିବା ସମୟରେ ବୁଡି ଯାଇଥିବା ଅନୁମାନ କରାଯାଇଛି । ତେବେ ମୃତକ ରାଧୁ ଜଣେ ମାନସିକ ରୋଗୀ ହୋଇଥିବା ଜଣାପଡ଼ିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
