ଢେଙ୍କାନାଳ: କ୍ରମାଗତ ଭାବେ ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢି ଚାଲିଛି । ବୁଧବାର ଢେଙ୍କାନାଳ ଜିଲ୍ଲାରେ ୨୫ଜଣ ପଜେଟିଭ ଚିହ୍ନଟ ହୋଇଥିବାବେଳେ ମୋଟ ପଜେଟିଭ ସଂଖ୍ୟା ୯୮୪ରେ ପହଞ୍ଚିଛି । ଏହି ନୂଆ ୨୫ଜଣ ଆକ୍ରାନ୍ତଙ୍କ ମଧ୍ୟରୁ ଭୁବନ ଏନଏସିରୁ ୧୩ ଜଣ, ଭୁବନ ବ୍ଳକରୁ ୨ଜଣ, ସଦର ବ୍ଳକରୁ ୪ଜଣ, ହିନ୍ଦୋଳ ବ୍ଳକ ଓ ଢେଙ୍କାନାଳ ପୌରାଞ୍ଚଳରୁ ୨ଜଣ ଲେଖାଏଁ ପଜେଟିଭ ଚିହ୍ନଟ ହୋଇଛନ୍ତି । ଅନ୍ୟପଟେ ଗଦିଁଆ ଓ ହିନ୍ଦୋଳ ଏନଏସିରୁ ଜଣେ ଲେଖାଏଁ ଚିହ୍ନଟ ହୋଇଛନ୍ତି ।
ଢେଙ୍କାନାଳ ମ୍ୟୁନିସପାଲଟି ଦେଉଳ ସାହି ଓ କାଳିସାହିରୁୁ ଜଣେ ଲେଖାଏଁ ପଜେଟିଭ ଚିହ୍ନଟ ହୋଇଛନ୍ତି। ଏହି ୨୫ ଜଣ ଆକ୍ରାନ୍ତଙ୍କ ମଧ୍ୟରୁ ୨୦ଜଣ ଆଣ୍ଟିଜେନ ଟେଷ୍ଟରୁ ଓ ଅନ୍ୟ ୫ ଜଣ କଟକ ଏସସିବି ଓ ଭୁବନେଶ୍ବର ମେଡିକାଲରୁ ଚିହ୍ନଟ ହୋଇଛନ୍ତି । ସମସ୍ତଙ୍କୁ ଢେଙ୍କାନାଳ କୋଭିଡ ହସ୍ପିଟାଲ ଓ ଗୋବିନ୍ଦପୁରସ୍ଥିତ କୋଭିଡ ହେଲଥ କେୟାର ସେଣ୍ଟରରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି।
ସେମାନେ ରହୁଥିବା ଘର ଓ ସଂଲଗ୍ନ ଅଞ୍ଚଳ ଗୁଡିକୁ ବିଶୋଧନ କରାଯାଇଛି । ସେପଟେ ଜିଲ୍ଲାରେ ଆଜି ୧୫ ଆକ୍ରାନ୍ତ ସୁସ୍ଥ ହୋଇ ଫେରିଥିବା ସୂଚନା ମିଳିଛି । ବର୍ତ୍ତମାନ ସୁଦ୍ଧା ଜିଲ୍ଲାରେ ମୋଟ ୯୮୪ ଆକ୍ରାନ୍ତ ଚିହ୍ନଟ ହୋଇଥିବାବେଳେ ସେମାନଙ୍କ ମଧ୍ୟରୁ ୬୫୦ ଜଣ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଛନ୍ତି। ୩୩୩ ଜଣ ଆକ୍ରାନ୍ତ ଚିକିତ୍ସିତ ଅଛନ୍ତି।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
