ଦେବଗଡ: ଜିଲ୍ଲାରେ ମଙ୍ଗଳବାର ଚିହ୍ନଟ ହୋଇଛନ୍ତି ଜଣେ କୋରୋନା ଆକ୍ରାନ୍ତ । ସମ୍ପୃକ୍ତ ଆକ୍ରାନ୍ତ ଜଣଙ୍କ ରାଜ୍ୟର ଏକ ହଟସ୍ପଟ ଜିଲ୍ଲାରୁ ଫେରିଥିବା ଜଣା ପଡିଛି । ପଜିଟିଭ ଚିହ୍ନଟ ହେବା ପରେ ସମ୍ପୃକ୍ତ ଆକ୍ରାନ୍ତଙ୍କୁ ଚିକିତ୍ସା ପାଇଁ ଦେବଗଡ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ତାଙ୍କର ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ନେଇ ଜଣା ପଡିଛି ।
ମଙ୍ଗଳବାର ପଜିଟିଭ ମାମଲାକୁ ମିଶାଇ ଜିଲ୍ଲାରେ ମୋଟ କୋରୋନା ଆକ୍ରାନ୍ତ ସଂଖ୍ୟା 81ରେ ପହଞ୍ଚିଛି । ସେମାନଙ୍କ ମଧ୍ୟରୁ 69 ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ 13ଟି ମାମଲା ସକ୍ରିୟ ରହିଛି । ତେଣୁ ମୋଟାମୋଟି ଭାବେ ଜିଲ୍ଲାରେ କୋରୋନା ସ୍ଥିତି ନିୟନ୍ତ୍ରଣାଧିନ ରହିଥିବା ଜଣା ପଡିଛି । ଇତି ମଧ୍ୟରେ କୋଭିଡ-19 ପର୍ଯ୍ୟବେକ୍ଷକ ତଥା ରାଜସ୍ବ ଓ ପରିଚାଳନା ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ଏବଂ ଓଡିଶା ରାଜ୍ୟ ସମବାୟ ବ୍ୟାଙ୍କ ଲିମିଟେଡ ପରିଚାଳନା ନିର୍ଦ୍ଦେଶକ ଗୋପବନ୍ଧୁ ଶତପଥୀ ଜିଲ୍ଲା ବସ୍ତରେ ଆସି କୋରୋନା ସ୍ଥିତି ସମୀକ୍ଷା କରିଛନ୍ତି ।
ଏହି ଗସ୍ତ ସମୟରେ ଉଭୟେ ଜିଲ୍ଲାର କୋଭିଡ କେୟାର ସେଣ୍ଟର ଓ କୋଭିଡ କେୟାର ହୋମ ଆଦି ବୁଲି ଦେଖିଥିଲେ । ଏଥିସହ ସ୍ଥାନୀୟ ସର୍କିଟ ହାଉସଠାରେ ଜିଲ୍ଲାପାଳ ସୁଧାଂଶୁ ମୋହନ ସାମଲ ଓ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ଼ଃ ମନୋଜ ଉପାଧ୍ୟାୟଙ୍କ ସହିତ ବିଭିନ୍ନ ସତର୍କତାମୂଳକ ପଦକ୍ଷେପ ସମ୍ପର୍କରେ ଆଲୋଚନା କରିଛନ୍ତି ।
ଦେବଗଡରୁ ସରୋଜ ଶତପଥି, ଇଟିଭି ଭାରତ
