ଦେବଗଡ: ଦୀର୍ଘ ସାତ ବର୍ଷ ହେଲା ବାପା ମା’ଙ୍କ ବିନା ଡହଳ ବିକଳ ହେଉଛନ୍ତି ତିନି ଜଣ ଶିଶୁ । ସେପଟେ ଏମାନଙ୍କ ଦାୟିତ୍ବ ନେବା 70 ବର୍ଷୀୟ ବୁଢୀ ମା’ଙ୍କ ପାଇଁ ଏବେ କଷ୍ଟକର ବ୍ୟାପାର ହୋଇ ପଡିଛି । ବୁଢୀ ବୟସରେ ବିଧବା ବୃଦ୍ଧାଙ୍କୁ ସରକାରୀ ଭତ୍ତା ମିଳୁନଥିବା ବେଳେ ତିନି ଶିଶୁଙ୍କ ଲାଳନ ପାଳନ ଏବେ ପାଲଟିଛି ଚିନ୍ତାର କାରଣ । ସେପଟେ ଅର୍ଥାଭାବ ପାଇଁ ଅନ୍ଧକାର ଭିତରକୁ ଠେଲି ହୋଇ ଯାଇଛି ତିନି ଶିଶୁଙ୍କ ଭବିଷ୍ୟତ । ଏ ହେଉଛି ଦେବଗଡ ଜିଲ୍ଲା ରିଆମାଳ ବ୍ଲକ ବାଘମାରି ଗାଁ 70 ବର୍ଷୀୟା ବୃଦ୍ଧା ରଙ୍ଗ ଭୋଇଙ୍କ କଥା ।
ଆଜିକୁ ଦୀର୍ଘ 7 ବର୍ଷ ପୂର୍ବେ ପୁଅ ଭାରତ ଭୋଇ ଓ ବୋହୂ ସୁଭାଗିନୀ ଭୋଇ ଏକ ଅଜଣା ରୋଗରେ ପୀଡିତ ହୋଇ ଆରପାରିକୁ ଚାଲିଯାଇଥିଲେ । ଆଉ ପଛରେ ତିନି ପୁଅ ଝିଅଙ୍କୁ ବାପାମା’ ଛେଉଣ୍ଡ କରି ଛାଡିଯାଇଥିଲେ । ଫଳରେ ବଡ ଝିଅ ହାଉଳି ଭୋଇ(14), ପୁଅ ଲୁଲୁ ଭୋଇ(12) ଓ ସାନ ଝିଅ ନିଲା ଭୋଇ(10)ଙ୍କ ଦେଖାଶୁଣା ପାଇଁ ଅଣ୍ଟା ଭିଡିଥିଲେ ବିଧବା ବୁଢୀ ମା’ ରଙ୍ଗ ଭୋଇ ।
ରଙ୍ଗଙ୍କୁ ବର୍ତ୍ତମାନ ସୁଦ୍ଧା କୌଣସି ସରକାରୀ ସହାୟତା ମିଳୁନଥିବା ବେଳେ ମୂଲମଜୁରୀ ଲାଗି ଯାହା କିଛି ରୋଜଗାର କରନ୍ତି ସେଇଥିରେ ଚଳେ ଚାରି ପ୍ରାଣୀ କୁଟୁମ୍ବ । ହେଲେ ଧିରେ ଧିରେ ବୟସ ବଢିବା ସହ ବାହୁ ବଳ କମୁଥିବାରୁ ପିଲାଙ୍କ ଲାଳନ ପାଳନ ସମ୍ଭବ ରଙ୍ଗଙ୍କ ପକ୍ଷେ ହୋଇ ପାରୁନାହଁ । ଅନ୍ୟପଟେ ସରକାରୀ ସହାୟତା ନାଁରେ ମିଳୁଛି କେବଳ 5 କିଲୋଗ୍ରାମ ଚାଉଳ । ଘର ଖଣ୍ଡେ ବି ମିଳିଛି ହେଲେ ତା’ର ଅବସ୍ଥା ନକହିଲେ ଭଲ । ଏପରି ସ୍ଥିତିରେ ପିଲାଙ୍କ ପାଠ କଥା ପଚାରେ ବା କିଏ ?
ଗୋଟିଏ ପଟେ ରଙ୍ଗଙ୍କ ବୟସ ବଢି ଚାଲିଥିବାରୁ ହାତ ବାନ୍ଧି ବସିବାକୁ ବାଧ୍ୟ ହେଉଥିବା ବେଳେ ଅନ୍ୟପଟେ ସାହାଯ୍ୟ ପାଇଁ ପର ଘରେ ମୂଲ ଲାଗିବାକୁ ବାଧ୍ୟ ହେଉଛି ନାତୁଣୀ ହାଉଳି । ଏମିତିରେ ତିନି ଶିଶୁଙ୍କ ଥଇଥାନ ଦିଗରେ ଜିଲ୍ଲା ପ୍ରଶାସନ ତଥା ଜିଲ୍ଲା ଶିଶୁ ସୁରକ୍ଷା ବିଭାଗ ବିଶେଷ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି ।
ଦେବଗଡରୁ ସରୋଜ ଶତପଥୀ, ଇଟିଭି ଭାରତ
