ଦେବଗଡ଼: ଦେବଗଡ଼ ପୌର ପରିଷଦ ପକ୍ଷରୁ ପୌରାଞ୍ଚଳରେ ପଲିଥିନ ଯାଞ୍ଚ । ଦେବଗଡ଼ ଜିଲ୍ଲାପାଳ ସୁଧାଂଶୁ ମୋହନ ସାମଲଙ୍କ ନିର୍ଦ୍ଦେଶ କ୍ରମେ ଗୁରୁବାର ପୌର ପରିଷଦ ପକ୍ଷରୁ ପୌରାଞ୍ଚଳର ଦୈନିକ ବଜାର ସମେତ ବିଭିନ୍ନ ସ୍ଥାନରେ ପଲିଥିନ ଯାଞ୍ଚ ଓ ରାସ୍ତା ଅବରୋଧ ଉଚ୍ଛେଦ କାର୍ଯ୍ୟକ୍ରମ ଆରମ୍ଭ କରାଯାଇଛି ।
ଗୁରୁବାର ପୂର୍ବାହ୍ନରେ ପୌର ନିର୍ବାହୀ ଅଧିକାରୀ ଆତସୀ ପରିଡା , ସିଏମଏମ ଅଭିଷେକ ମିଶ୍ର, ଗୋଷ୍ଠୀ ସଙ୍ଗଠିକା ମୋନାଲିସା ପଣ୍ଡାଙ୍କ ସହିତ ପୋଲିସ ଓ ବନ ବିଭାଗ କର୍ମଚାରୀଙ୍କ ଉପସ୍ଥିତିରେ ପୌରାଞ୍ଚଳର ଦୈନିକ ବଜାର ଓ ବିଭିନ୍ନ ୱାର୍ଡରେ ପଲିଥିନ ଯାଞ୍ଚ କରାଯିବା ସହିତ ରାସ୍ତା ଜବର ଦଖଲ ଉଚ୍ଛେଦ କରାଯାଇଥିଲା ।
ଦେବଗଡ଼ ପୌରାଞ୍ଚଳକୁ ପଲିଥିନ ମୁକ୍ତ କରିବା ଉଦ୍ଦେଶ୍ୟରେ ପଲିଥିନ ବ୍ୟବହାରକୁ ସମ୍ପୂର୍ଣ୍ଣ ନିଷେଧ କରାଯାଇଥିଲା । ଏଥିସହିତ ପୌରାଞ୍ଚଳରେ କେତେକ ବ୍ୟବସାୟୀ ରାସ୍ତା ଉପରକୁ ମାଡ଼ି ଆସି ଓ ରାସ୍ତା ଅବରୋଧ କରି ବ୍ୟବସାୟ କରି ଆସୁଥିବାରୁ ସେମାନଙ୍କୁ ଚେତାବନୀ ଦିଆଯାଇଥିଲା ।
ସୂଚନାଯୋଗ୍ୟ ଯେ, ଦେବଗଡ଼ ପୌରାଞ୍ଚଳରେ ପଲିଥିନର ବହୁଳ ବ୍ୟବହାର ଯୋଗୁଁ ସହର ପରିବେଶ ପ୍ରଦୂଷିତ ହେବା ସଙ୍ଗେ ସଙ୍ଗେ ପଲିଥିନ ଖାଇ ବହୁ ସଂଖ୍ୟାରେ ଗାଈଗୋରୁ ମୃତ୍ୟୁବରଣ କରିଛନ୍ତି । ସେହିପରି କେତେକ ଅସାଧୁ ବ୍ୟବସାୟୀ ରାସ୍ତା ଓ ଡ୍ରେନ ଉପରେ ନିଜ ଦୋକାନ ଗୃହ ନିର୍ମାଣ କରି ବ୍ୟବସାୟ କରି ଆସୁଥିବାରୁ ରାସ୍ତା ସଙ୍କୁଚିତ ହେବା ସଙ୍ଗେସଙ୍ଗେ ଦୁର୍ଘଟଣା ବୃଦ୍ଧି ପାଉଛି । ତେବେ ଦେବଗଡ଼ ସହରରେ ପଲିଥିନ ଯାଞ୍ଚ ଓ ରାସ୍ତା ଅବରୋଧ ଉଛେଦ କାର୍ଯ୍ୟକ୍ରମ ଆଗକୁ ଜାରି ରହିବ ବୋଲି ପୌର ନିର୍ବାହୀ ଅଧିକାରୀ ଶ୍ରୀମତି ପରିଡା ପ୍ରକାଶ କରିଛନ୍ତି ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
