ଢେଙ୍କାନାଳ: ଖଣିରେ କାମ କରୁଥିବା ବେଳେ ପଥର ଭୁଶୁଡି ପଡିବା ଫଳରେ ପଥର ତଳେ ଚାପି ହୋଇ ଜଣେ ଶ୍ରମିକର ମୃତ୍ୟୁ ଘଟିଛି । ଏପରି ଦୁର୍ଘଟଣା ଘଟିଛି ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ଛାଟିଆ ମଙ୍କଡ଼ା ପଥର ଖଣିରେ । ମୃତ ଶ୍ରମିକ ଜଣଙ୍କ ସ୍ଥାନୀୟ ଛାଟିଆ ଗ୍ରାମର ରଞ୍ଜିତ ଦେହୁରୀ ।
ସବୁଦିନ ପରି ରଞ୍ଜିତ ଅନ୍ୟ ଶ୍ରମିକଙ୍କ ସହ ଖଣିକୁ କାମ କରିବାକୁ ଯାଇଥିଲେ । ତେବେ ଆଜି(ଶନିବାର) ଖଣିରେ ଟ୍ରକରେ ପଥର ବୋଝେଇ ବେଳେ କିଛି ପଥର ଭୁଶୁଡି ରଞ୍ଜିତଙ୍କ ଉପରେ ପଡିଯାଇଥିଲା । ଫଳରେ ଗୁରୁତର ଅବସ୍ଥାରେ ତାଙ୍କୁ ଚିକିତ୍ସାପାଇଁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତରଖାନାକୁ ଆସିବା ପୂର୍ବରୁ ତାଙ୍କର ମୃତ୍ୟୁ ଘଟିଥିବା ଜଣାପଡିଛି । ତାଙ୍କର ଏପରି ଦୁର୍ଘଟଣାରେ ମୃତ୍ୟୁ ପାଇଁ ଖଣି ମାଲିକଙ୍କୁ ଦାୟୀ କରିଛନ୍ତି ମୃତ ଶ୍ରମିକଙ୍କ ପରିବାର । ତେବେ ଖଣି ମାଲିକ ଫେରାର ହୋଇଯାଇଥିବା ବେଳେ ଖଣିରେ କାମ କରୁଥିବା ଜଣେ ସୁପରଭାଇଜରକୁ ସଦର ପୋଲିସ ଅଟକ ରଖି ପଚରାଉଚୁରା ଜାରି ରଖିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
