ଦେବଗଡ: ଉଚ୍ଚ ଗବେଷଣା ପାଇଁ ଜର୍ମାନ ଯାତ୍ରା କରିବେ ଦେବଗଡ ପୌରାଞ୍ଚଳର ମେଧାବୀ ଛାତ୍ରୀ ମୋନା ମିନାକ୍ଷୀ ମଞ୍ଜରୀ ଭୁକ୍ତା । କେବଳ ଜିଲ୍ଲାର ନୁହେଁ ବରଂ ସାରା ରାଜ୍ୟକୁ ଏନେଇ ଗର୍ବିତ କରିଛନ୍ତି ମୋନା । ଜର୍ମାନର ଗୁଟେନବର୍ଗ ବିଶ୍ବ ବିଦ୍ୟାଳୟରେ ପଦାର୍ଥ ବିଜ୍ଞାନର ନାନୋମ୍ୟାଗନେଟିଜିମ ଓ ସ୍ପ୍ରିଟନିକ୍ସ ଉପରେ ସେ ଗବେଷଣା କରିବା ପାଇଁ ମନୋନୀତ ହୋଇଛନ୍ତି । ପ୍ରଦ୍ୟୁମ୍ନ କୁମାର ଭୁକ୍ତା ଓ ନୟନି ମଞ୍ଜରୀ ଭୁକ୍ତାଙ୍କ ଔରସରୁ ଜନ୍ମ ନେଇଥିବା ମୋନାଙ୍କ ଏହି କୃତୀତ୍ବ ପାଇଁ ଏବେ ତାଙ୍କୁ ସାରା ରାଜ୍ୟରୁ ଛୁଟୁଛି ଶୁଭେଚ୍ଛାର ସୁଅ ।
ମୋନା 2012 ମସିହାରେ ଦେବଗଡ ସରସ୍ବତୀ ଶିଶୁ ବିଦ୍ୟା ମନ୍ଦିରରୁ ମ୍ୟାଟ୍ରିକ ପାସ କରିଥିଲେ । ଏହାପରେ ସେ ଯୁକ୍ତ ଦୁଇରେ କୃତକାର୍ଯ୍ୟ ହେବା ପରେ ନାଇଜରରେ ପଦାର୍ଥ ବିଜ୍ଞାନ ଅଧ୍ୟୟନ କରିଥିଲେ । ପରେ ପରେ ସେ ମୁମ୍ବାଇ ଆଇଟିଆଇରେ ଇଣ୍ଟର୍ଣ୍ଣସିପ୍ କରିଥିଲେ । ସମାନ ସମୟରେ ସେ ଜର୍ମାନର ଏକ ବିଶ୍ବ ବିଦ୍ୟାଳୟରେ ମଧ୍ୟ ଇଣ୍ଟର୍ଣ୍ଣସିପ୍ କରିବା ପାଇଁ ସୁଯୋଗ ପାଇଥିଲେ ।
ତେବେ ଜର୍ମାନୀରେ ମୋନା ସ୍ପିନଟେକ୍ସଚରର ଉଚ୍ଚ ସ୍ପେଶିଆଲ ରିଜୋଲ୍ୟୁସନ ମ୍ୟାଗ୍ନେଟିକ ଇମେଜିଂରେ ଅନୁସନ୍ଧାନ କରିବା ନେଇ ସ୍ପଷ୍ଟ ହୋଇଛି । ଏଥିରେ ଅଲ୍ଟ୍ରା ଲୋ ପାୱାର ସହିତ ପେନ ଡ୍ରାଇଭ, ହାର୍ଡ ଡିସ୍କ ଓ ର୍ୟାମ ଇତ୍ୟାଦିର ଷ୍ଟୋରେଜ ଡିଭାଇସର ଆକାରକୁ ହ୍ରାସ କରିହେବ । କମ ବୟସରେ ମୋନାଙ୍କ ଏହି ସଫଳତା ପାଇଁ ଏବେ ବାପା ମା’ଙ୍କ ସହ ରାଜ୍ୟବାସୀ ବେଶ ଗର୍ବିତ ।
ଦେବଗଡରୁ ସରୋଜ ଶତପଥୀ, ଇଟିଭି ଭାରତ
