ଦେବଗଡ଼ : ବନ୍ୟଜନ୍ତୁ ଶିକାର ପାଇଁ ବିଛାଯାଇଥିବା ବିଦ୍ୟୁତ ତାର ସଂସ୍ପର୍ଶରେ ଆସି ଯୁବକଙ୍କ ମୃତ୍ୟୁ । ଦେବଗଡ଼ ଜିଲ୍ଲା ରିଆମାଳ ଥାନା ତାରଙ୍ଗ ପଞ୍ଚାୟତ ଅନ୍ତର୍ଗତ ନିଶାବିରା ଗ୍ରାମ ପହିନାଳ କଟା ଜଙ୍ଗଲରେ ଏଭଳି ଘଟଣା ଘଟିଛି । ଏହି ଜଙ୍ଗଲରେ ବନ୍ୟଜନ୍ତୁ ଶିକାର ପାଇଁ ବିଛାଯାଇଥିଲା ବିଦ୍ୟୁତ ତାର। ମୃତକ ନିଶାବିରା ଗ୍ରାମର ଦେବ ସାହୁ ବୋଲି ଜଣା ପଡ଼ିଛି ।
ସୂଚନାନୁଯାୟୀ, ନିଶାବିରା ଗ୍ରାମର ଦେବ ସାହୁ ସୋମବାର ରାତିରେ ଘରୁ ଶୌଚ ପାଇଁ ବାହାରକୁ ଯାଇଥିଲେ । ହେଲେ ଆଉ ଘରକୁ ଫେରିନଥିଲେ । ତେବେ ବିଳମ୍ବିତ ରାତିଯାଏଁ ଦେବ ଘରକୁ ନଫେରିବାରୁ ପରିବାର ଲୋକେ ଖୋଜା ଖୋଜି ଆରମ୍ଭ କରିଥିଲେ ।
କିନ୍ତୁ ଘରଲୋକେ ପାଇ ନଥିଲେ । ଆଜି ସକାଳୁ କିଛି ଗ୍ରାମବାସୀ ପହିନାଳ କଟା ଜଙ୍ଗଲରେ ଦେବ ସାହୁଙ୍କର ମୃତଦେହ ପଡ଼ିଥିବା ଦେଖି ପରିବାରକୁ ଖବର ଦେଇଥିଲେ । ମୃତକଙ୍କ ପୁଅ କୁନା ସାହୁ ରିଆମାଳ ପୋଲିସକୁ ସୂଚନା ଦେଇଥିଲେ । ଖବରପାଇ ଥାନା IIC ଲଳିତା ପ୍ରଧାନ ସଦଳବଳେ ଘଟଣାସ୍ଥଳରେ ପହଞ୍ଚି ମୃତଦେବ ଜବତ କରିବା ସହ ତଦନ୍ତ ଆରମ୍ଭ କରିଛନ୍ତି । ଘଟଣାସ୍ଥଳରୁ ଶିକାରୀମାନେ ବିଦ୍ୟୁତ୍ ତାର ନେଇ ଫେରାର୍ ହୋଇଯାଇଛନ୍ତି ।
ଅନ୍ୟପକ୍ଷରେ ଜଙ୍ଗଲରେ କିଏ ଏହି ବିଦ୍ୟୁତ ତାର ବିଛାଇ ଥିଲା ତାକୁ ନେଇ ଚାଲିଛି ତନାଘନା । ତେବେ ଏହାକୁ ନେଇ ପୋଲିସ ପଚରାଉଚରା କରୁଛି । ଏହାସହ ଆଖପାଖ ସ୍ଥିତି ଉପରେ ନଜର ରଖି ତଦନ୍ତ କରୁଛି ପୋଲିସ । ସେପଟେ ଦେବଙ୍କ ମୃତ୍ୟୁକୁ ନେଇ ପରିବାରରେ ଶୋକର ଛାୟା ଖେଳିଯାଇଛି ।
ଇଟିଭି ଭାରତ, ଦେବଗଡ଼
