ଦେବଗଡ଼: ଜିଲ୍ଲା ତିଳେଇବଣି ବ୍ଲକ ଝରାଗୋଗୁଆରୁ ଲୁଢର ଗାଁରେ ନିର୍ମାଣ ହେଇ ପାରୁନି ପୋଲ । ହନ୍ତସନ୍ତ ହେଉଛନ୍ତି ଗ୍ରାମବାସୀ । ଗାଁକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ଗ୍ରାମ୍ୟ ରାସ୍ତାରେ ରହିଛି ଛେଳିଆମେଣ୍ଢିଆ ନାଳ । ୨୦୧୫-୧୬ ମସିହାରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ନିର୍ମାଣ ହୋଇଥିଲା ରାସ୍ତା । ହେଲେ ଛେଳିଆମେଣ୍ଢିଆ ନାଳ ଉପରେ ପୋଲଟିଏ ନିର୍ମାଣ କରିପାରୁ ନାହାନ୍ତି ବିଭାଗୀୟ କର୍ତ୍ତୃପକ୍ଷ ।
ନାଳ ଉପରେ ପୋଲଟିଏ ନିର୍ମାଣ ହୋଇ ନଥିବାରୁ ରାସ୍ତା ଦେଇ ଯାତାୟତ କରିବା ସ୍ଥାନୀୟ ଲୋକଙ୍କ ପକ୍ଷରେ ସମ୍ଭବ ହୋଇ ପାରୁନାହିଁ । ଏହି ରାସ୍ତା ଉପରେ ଡିମିରିକୁଦା, ପୋହଳାମରା, ଲୁଢର, ଛେଳିଆମେଣ୍ଢିଆ ଆଦି ୭ଟି ଗାଁ ଲୋକେ ନିର୍ଭର କରୁଛନ୍ତି । ବର୍ଷା ୪ ମାସ ନାଳରେ ବନ୍ୟା ଆସିବା ଫଳରେ ଏହି ରାସ୍ତାଟି ଯାତାୟତ ଉପଯୋଗୀ ହୋଇ ରହୁନାହିଁ । ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଲୋକଙ୍କ ଯାତାୟତ ସୁବିଧା ପାଇଁ ସରକାରଙ୍କ ରାଜକୋଷରୁ କୋଟି କୋଟି ଟଙ୍କା ବ୍ୟୟ କରି ପ୍ରଧାନମନ୍ତ୍ରୀ ରାସ୍ତା ନିର୍ମାଣ ହେଲା ସତ । ହେଲେ ନାଳରେ ପୋଲଟିଏ ନିର୍ମାଣ ହୋଇ ପାରୁନଥିବାରୁ ଏହାର ସୁଫଳ ସ୍ଥାନୀୟ ଲୋକେ ପାଇପାରିଲେ ନାହିଁ ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
