ଦେବଗଡ: ଡରାଉଛି ଅଦୃଶ୍ୟ ଶକ୍ତି । ଘଟାଉଛି ଗୋଟିଏ ପରେ ଗୋଟିଏ ଅଦ୍ଭୁତ କାଣ୍ଡ । ଭୟରେ ଗାଁ ଛାଡି ଅନ୍ୟ ସମ୍ପର୍କୀୟଙ୍କ ଘରେ ଆଶ୍ରୟ ନେଇଛନ୍ତି ଦେବଗଡ଼ ଜିଲ୍ଲା ରଙ୍ଗମାଟିଆ ଗାଁର 4ଟି ପରିବାର ।
ଅବିଶ୍ୱସନୀୟ ହେଲେବି ଘଟଣାଟି ସମ୍ପୂର୍ଣ୍ଣ ସତ୍ୟ । ଦେବଗଡ଼ ଜିଲ୍ଲା ରିଆମାଳ ବ୍ଲକ ତାବଡା ପଞ୍ଚାୟତର ରଙ୍ଗମାଟିଆ ଗାଁରେ ବସବାସ କରିଆସୁଥିଲେ ଯୋଗେଶ୍ୱର ଖଡ଼ିରତ୍ନ ଓ ତାଙ୍କ ତିନିଭାଇଙ୍କ ପରିବାର । ଗତ ଚାରିମାସ ପୂର୍ବରୁ ତାଙ୍କର ବାସଭବନରେ କୌଣସି ଏକ ଅଦୃଶ୍ୟ ଶକ୍ତି ଦ୍ୱାରା ଘଟିଥିଲା କେତେକ ଅଦ୍ଭୁତ କାଣ୍ଡ ।
ଫଳରେ ନିଜ ଗାଁ ଓ ଘର ଛାଡି ଭୟରେ ଚାରୋଟି ପରିବାର କୁଡ଼ାଳପାଳ ଗାଁରେ ଥିବା ନିଜ ପୁତୁରାଙ୍କ ଘରେ ଆଶ୍ରୟ ନେଇଛନ୍ତି । ମାତ୍ର ଗତ କିଛିଦିନ ହେଲା ସେଠାରେ ମଧ୍ୟ ଦେଖିବାକୁ ମିଳିଛି ପୂର୍ବ ଭଳି ଅଦ୍ଭୁତ କାଣ୍ଡ । ଏଥିସହିତ ପରିବାର ସଦସ୍ୟଙ୍କ ମଧ୍ୟରେ ଦେଖିବାକୁ ମିଳିଛି ଅସ୍ୱାଭାବିକ ଲକ୍ଷଣ । ଯାହାକି ଏହି ପରିବାର ସଦସ୍ୟଙ୍କ ମଧ୍ୟରେ ଏକ ଅଜଣା ଭୟ ସଞ୍ଚାର କରିବା ସହିତ ଅସହ୍ୟ ମାନସିକ ଯନ୍ତ୍ରଣା ଦେଉଛି ।
ଏହି ଅଦୃଶ୍ୟ ଶକ୍ତି କବଳରୁ ପରିବାରଟି କିଭଳି ଉଦ୍ଧାର ପାଇବ ତାହା ଏକ ପ୍ରଶ୍ନବାଚୀ ସୃଷ୍ଟି କରିଛି । କେଉଁ ଅଦୃଶ୍ୟ ଶକ୍ତି କେଉଁ ଉଦ୍ଦେଶ୍ୟରେ ପରିବାରଟିକୁ ଏଭଳି ଭୟଭୀତ କରୁଛି ? ସେଦିଗରେ ଅନୁସନ୍ଧାନ କରାଗଲେ ବାସ୍ତବ ତଥ୍ୟ ଜଣାପଡ଼ନ୍ତା ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
