ଦେବଗଡ: ପ୍ରେମ ଜାଲରେ ଫସାଇ 50 ହଜାର ଟଙ୍କାରେ ପ୍ରେମିକାକୁ ବିକିଲା ପ୍ରେମିକ । ଏଭଳି ଘଟଣା ଘଟିଛି ଜିଲ୍ଲାର ରିଆମାଳ ଥାନା ଅଞ୍ଚଳରେ । ରଙ୍ଗମାଟିଆ ଗାଁର ଭଞ୍ଜ କିଶୋର ନାଏକ ଜଣେ ଯୁବକ ଦେବଗଡ ଥାନା ଅନ୍ତର୍ଗତ ଛେପଲିପାଲି ଗାଁର ଜଣେ ଯୁବତୀଙ୍କୁ ପ୍ରେମ ଜାଲରେ ଫସାଇ 50 ହଜାର ଟଙ୍କାରେ ବିକ୍ରି କରିଥିଲା । ଯାହାର ପର୍ଦ୍ଦାଫାସ କରିବା ସହିତ ଅଭିଯୁକ୍ତକୁ ଗିରଫ କରିଛି ପୋଲିସ ।
ସୂଚନା ମୁତାବକ, ଗତ ଡିସେମ୍ବର ମାସରେ ମଧ୍ୟପ୍ରଦେଶର ସୁଲତାନଗଞ୍ଜରେ ଧର୍ମେଶ ରାଜପୁତ ନାମକ ଜଣେ ବ୍ୟକ୍ତିକୁ 50 ହଜାର ଟଙ୍କାରେ ଯୁବତୀଙ୍କୁ ବିକ୍ରି କରି ଦେଇଥିଲା ଅଭିଯୁକ୍ତ ଯୁବକ । ଏପରିକି ଯୁବତୀଙ୍କ ସୁନା ଗହଣା ଓ ତାଙ୍କ ପାଖରେ ଥିବା 15 ହଜାର ଟଙ୍କା ନେଇ ଫେରାର ହୋଇଯାଇଥିଲା ଅଭିଯୁକ୍ତ । ତେବେ ଯୁବତୀ ଜଣଙ୍କ ଅନିଚ୍ଛା ସତ୍ତ୍ବେ ଧର୍ମେଶକୁ ବିବାହ କରି କିଛିଦିନ ରହିବା ପରେ ସୁଯୋଗ ଦେଖି ସମସ୍ତ ଘଟଣା ଫୋନ ଯୋଗେ ନିଜ ପରିବାର ଲୋକଙ୍କୁ ଜଣାଇଥିଲେ ।
ଏନେଇ ପରିବାର ଲୋକେ ଦେବଗଡ ଏସପି ରାହୁଲ ଜୈନଙ୍କୁ ଜଣାଇଥିଲେ । ପରିବାର ଲୋକଙ୍କ ପାଖରୁ ଅଭିଯୋଗ ପାଇବା ପରେ ଦେବଗଡ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ଏସପିଙ୍କ ନିର୍ଦ୍ଦେଶ କ୍ରମେ ଏକ ସ୍ବତନ୍ତ୍ର ପୋଲିସ ଟିମ ସୁଲତାନଗଞ୍ଜରେ ପହଞ୍ଚି ଯୁବତୀଙ୍କୁ ଉଦ୍ଧାର କରିଛି । ଯୁବତୀଙ୍କ ଅଭିଯୋଗ ଅନୁଯାୟୀ ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜୁ କରିବା ସହିତ ଅଭିଯୁକ୍ତ ଭଞ୍ଜ କିଶୋରକୁ ପୋଲିସ ରଙ୍ଗମାଟିଆରୁ ଗିରଫ କରି କୋର୍ଟ ଚାଲାଣ କରିଛି ।
ଅଭିଯୁକ୍ତ ଜଣକ ପୂର୍ବରୁ ଜିଲ୍ଲାର ଅନେକ ଯୁବତୀକୁ ନେଇ ବିଭିନ୍ନ ରାଜ୍ୟରେ ବିକ୍ରି କରିଥିବା ପୋଲିସ ସନ୍ଦେହ କରି ଏ ସମ୍ପର୍କରେ ଘଟଣାରେ ଅଧିକ ତଦନ୍ତ ଜାରି ରଖିଛି ।
ଦେବଗଡରୁ ସରୋଜ ଶତପଥୀ, ଇଟିଭି ଭାରତ
