ଦେବଗଡ଼: ବନବିଭାଗ ଦ୍ବାରା 4 ଶିକାରୀ ଗିରଫ । ଦେବଗଡ ପ୍ରଧାନପାଟ ସଂରକ୍ଷିତ ଜଙ୍ଗଲରେ ଜନ୍ତୁ ଶିକାର ପାଇଁ ଉଦ୍ୟମ କରୁଥିବା ବେଳେ ବନବିଭାଗ ଏମାନଙ୍କୁ ଗିରଫ କରିଛି । ସେମାନଙ୍କ ପାଖରୁ ବିଛାଯାଇଥିବା 10 ମିଟର ଲୁହା ତାର ଫାଶ ଜବତ କରାଯାଇଛି ।
ଦେବଗଡ଼ ବନଖଣ୍ଡ ଅନ୍ତର୍ଗତ ପ୍ରଧାନପାଟ ସଂରକ୍ଷିତ ଜଙ୍ଗଲରେ ଜନ୍ତୁ ଶିକାର ପାଇଁ ଫାଶ ବିଛେଇଥିବା ବେଳେ 4 ଜଣ ଶିକାରୀଙ୍କୁ ବନବିଭାଗ କର୍ମଚାରୀ ମାନେ ବନ୍ୟଜନ୍ତୁ ସୁରକ୍ଷା ଆଇନ ବଳରେ ଗିରଫ କରିଛନ୍ତି । ଗିରଫ ହୋଇଥିବା ଅଭିଯୁକ୍ତ ମାନେ ହେଲେ ରିଆମାଳ ଥାନା ଅନ୍ତର୍ଗତ ତେନ୍ତଳାବାହାଲ ଗାଁର କାର୍ତ୍ତିକ କିଷାନ , ଭୋଲେଶ୍ବର ଭୋଇ ଓ ତାବଡା ଗାଁର ବିଦ୍ୟା ଉଦାବର , ପ୍ରତାପ ଡୁଙ୍ଗ । ବନବିଭାଗ ପକ୍ଷରୁ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଥିଲା ଓ ସେଠାରେ ଜାମିନ ନାମଞ୍ଜୁର ହେବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଛି ।
ବନ୍ୟଜନ୍ତୁ ଶିକାର ସମ୍ପର୍କରେ କୌଣସି ସୂତ୍ରରୁ ଖବର ପାଇ ଦେବଗଡ଼ ଫରେଷ୍ଟର ପ୍ରଶ୍ନ ସାହୁଙ୍କ ନେତୃତ୍ବରେ ବନରକ୍ଷୀ ଭୋଲେଶ୍ବର ସାହୁ ଓ ଆର.ଏଫ.ସ୍କ୍ବାଡର ସଦସ୍ୟ ମାନେ ପ୍ରଧାନପାଟ ସଂରକ୍ଷିତ ଜଙ୍ଗଲରେ ତଲାସି କରୁଥିବା ବେଳେ ଏହି ଅଭିଯୁକ୍ତ ମାନଙ୍କୁ ଗିରଫ କରିଥିଲେ ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
