ଦେବଗଡ: ହୁତୁ ହୁତୁ ହୋଇ ଜଳୁଛି ଜଙ୍ଗଲ । ନିମିଷକ ମଧ୍ୟରେ ଜଳିପୋଡି ଛାରଖାର ହୋଇଯାଉଛି ବହୁ ମୂଲ୍ୟବାନ ବୃକ୍ଷରାଜି । ଜଙ୍ଗଲ ନିଆଁରୁ ନିସ୍ତାର ପାଉନାହାନ୍ତି ବନ୍ୟଜନ୍ତୁ ଓ ସରିସୃପ । ଅସ୍ଵାଭାବିକ ଭାବେ ବୃଦ୍ଧି ପାଉଛି ତାପମାତ୍ରା । ବିଗତ କିଛିଦିନ ହେଲା ବଣପାହାଡ଼ ପରିବେଷ୍ଟିତ ଦେବଗଡ଼ ଜିଲ୍ଲାରେ ଦେଖିବାକୁ ମିଳିଛି ଏଭଳି ସ୍ଥିତି ।
ଦେବଗଡରେ ଅଣାୟତ ହେଉଛି ଜଙ୍ଗଲ ନିଆଁ: ନଷ୍ଟ ହେଉଛି ବୃକ୍ଷରାଜି, ଆଖି ବୁଜୁଛନ୍ତି ବନ୍ୟଜନ୍ତୁ ଦେବଗଡ଼ ବନଖଣ୍ଡ ଅଧୀନସ୍ଥ ପ୍ରଧାନପାଟ, କୁରୁଡ଼କୋଟ, ହଦମୁଣ୍ଡା, ଚଡକମରା, ରମ୍ଭାଦେବୀ ଓ ରାଞ୍ଚି ବିଜୟୱାଡା ରାସ୍ତାକଡ଼ରେ ଥିବା ସଂରକ୍ଷିତ ଜଙ୍ଗଲରେ ନିଆଁଲାଗିଛି । ଏହି ନିଆଁରେ ପ୍ରତିଦିନ ଜଳିପୋଡି ଛାରଖାର ହୋଇଯାଉଛି ବହୁସଂଖ୍ୟାରେ ମୂଲ୍ୟବାନ ବୃକ୍ଷରାଜି । ଜଙ୍ଗଲରେ ଲାଗିଥିବା ନିଆଁ ଯୋଗୁଁ ଦିନକୁଦିନ ଅସ୍ୱାଭାବିକ ଭାବରେ ବୃଦ୍ଧି ପାଉଛି ଜିଲ୍ଲାର ତାପମାତ୍ରା । ନିଜର ସ୍ୱାର୍ଥ ସାଧନ ଉଦ୍ଦେଶ୍ୟରେ କିଛି ଦୁର୍ବୃତ୍ତ ବିଭିନ୍ନ ଜଙ୍ଗଲରେ ନିଆଁ ଲଗାଇ ଦେଉଥିବାରୁ, ଏହାକୁ ଲିଭାଇବାରେ ବନଭିଭାଗ କର୍ମଚାରୀମାନେ ନାକେଦମ ହୋଇ ସାରିଲେଣି । ତଥାପି ଜଙ୍ଗଲ ନିଆଁକୁ ଆୟତ୍ତ କରାଯାଇ ପାରୁନାହିଁ । ବରଂ ଏହି ନିଆଁ ଉଦବେଗଜନକ ଭାବେ ଅଧିକ ରୁ ଅଧିକ ଅଞ୍ଚଳକୁ ବ୍ୟାପିବାରେ ଲାଗିଛି । ବନବିଭାଗ ପକ୍ଷରୁ ଏଦିଗରେ ଯଦି କୌଣସି ଦୃଢ଼ ପଦକ୍ଷେପ ନ ନେଲେ ତେବେ ଆଗାମୀଦିନରେ ଜିଲ୍ଲାରୁ ଜଙ୍ଗଲ ସମ୍ପଦ ସମ୍ପୂର୍ଣ୍ଣ ଲୋପ ପାଇଯିବା ସହ ଜୈବ ବିବିଧତା ନଷ୍ଟ ହେବାର ଆଶଙ୍କାକୁ ଅସ୍ୱୀକାର କରାଯାଇନପାରେ ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
