ଦେବଗଡ଼: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରଚାର ଅଭିଯାନ ଅନ୍ତିମ ପର୍ଯ୍ୟାୟରେ ପହଞ୍ଚିଛି । ଆସନ୍ତା 16 ତାରିଖରେ ହେବାକୁ ଥିବା ନିର୍ବାଚନରେ ଭୋଟରଙ୍କୁ ହାତେଇବା ପାଇଁ ପ୍ରାର୍ଥୀଙ୍କ ଜୋରଦାର ପ୍ରଚାର କରୁଥିବା ଦେଖିବାକୁ ମିଳିଛି ।
ଦେବଗଡ଼ ଜିଲ୍ଲା ରିଆମାଳ ବ୍ଲକରେ ହେବାକୁ ଥିବା ପଞ୍ଚାୟତ ନିର୍ବାଚନର ଭୋଟ ଗ୍ରହଣ ପାଇଁ ପ୍ରଚାର ଅଭିଯାନ ଶେଷ ପର୍ଯ୍ୟାୟରେ ପହଞ୍ଚିଛି । ଚଳିତ ଥର ରିଆମାଳ ବ୍ଲକରେ ମହିଳା ପ୍ରାର୍ଥୀଙ୍କ ଅଂଶଗ୍ରହଣ ପୂର୍ବ ଅନୁପାତ ଠାରୁ ଯଥେଷ୍ଟ ବୃଦ୍ଧି ପାଇଛି । ମୁଖ୍ୟତଃ ସରପଞ୍ଚ ଓ ସମିତି ସଭ୍ୟ ପଦବୀ ପାଇଁ ଅଧିକ ସଂଖ୍ୟକ ମହିଳା ପ୍ରାର୍ଥୀ ପ୍ରତିଦ୍ବନ୍ଦିତା କରୁଥିବା ଦେଖାଯାଇଛି । ଆସନ୍ତା16 ତାରିଖ ଦିନ ଏହି ବ୍ଲକର ମୋଟ 26ଟି ପଞ୍ଚାୟତରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ହେବ। ଏଥିରେ ମୋଟ 83 ହଜାର 50 ସଂଖ୍ୟକ ଭୋଟର ନିଜ ମତଦାନ ସାବ୍ୟସ୍ତ କରିବେ । ଏଥିପାଇଁ ୱାର୍ଡ ମେମ୍ବରଠାରୁ ଆରମ୍ଭ କରି ସରପଞ୍ଚ, ସମିତି ସଭ୍ୟ ଓ ଜିଲ୍ଲା ପରିଷଦ ସଭ୍ୟ ପାଇଁ ପ୍ରତିଦ୍ବନ୍ଦିତା କରୁଥିବା ପ୍ରାର୍ଥୀ ମାନେ ନିଜନିଜ ପ୍ରଚାର ଅଭିଯାନ ଜୋରଦାର କରିଛନ୍ତି ।
ଏହି ବ୍ଲକର 26ଟି ପଞ୍ଚାୟତରେ ମୋଟ 90 ଜଣ ମହିଳା ପ୍ରାର୍ଥୀ ସରପଞ୍ଚ ଓ ସମିତି ସଭ୍ୟ ପଦବୀ ପାଇଁ ପ୍ରତିଦ୍ବନ୍ଦିତା କରୁଛନ୍ତି । ପ୍ରାର୍ଥୀମାନେ ଘର ଘର ବୁଲି ଜନତାଙ୍କ ଜନକଲ୍ୟାଣ ପ୍ରତିଶୃତି ଦେଇ ନିର୍ବାଚନର ମୁଖ୍ୟ ଆକର୍ଷଣ ପାଲଟିବା ପାଇଁ ଚେଷ୍ଟା ଜାରି ରଖିଛନ୍ତି । ନିର୍ବାଚନ ମୈଦାନରେ ଓହ୍ଲାଇ ଥିବା ମହିଳା ପ୍ରାର୍ଥୀମାନେ ନିଜ ବିଜୟ ନେଇ ଆଶାବାଦୀ ରହିଛନ୍ତି। ତେବେ ଆଉ ଦିନକ ପରେ ଜନତା କାହା ମୁଣ୍ଡରେ କଳସ ଢାଳିବେ ତାହା ଉପରେ ସଭିଙ୍କ ନଜର।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
