ଦେବଗଡ଼:ଓଡିଶାରେ ଅସୁରକ୍ଷିତ ହୋଇପଡିଛନ୍ତି ହାତୀ । ବିଭିନ୍ନ କାରଣରୁ ଅକାଳରେ ଯାଉଛି ଅନେକ ଗଜରାଜଙ୍କ ଜୀବନ । ଦେବଗଡ ଜିଲ୍ଲାର ଦଣ୍ଡାସିଂହା ବିଟ ଅନ୍ତର୍ଗତ ଗିନାହଜା ଗ୍ରାମ ନିକଟସ୍ଥ ବ୍ରାହ୍ମଣି ନଦୀବନ୍ଧ ଜଳାଶୟରୁ ମିଳିଛି ଏକ ହାତୀ ଛୁଆର ମୃତଦେହ । ତେବେ କେମିତି ହାତୀ ଛୁଆର ମୃତ୍ୟୁ ହେଲା, ତାହାର କାରଣ ବର୍ତ୍ତମାନ ସୁଦ୍ଧା ମଧ୍ୟ ସ୍ପଷ୍ଟ ହୋଇନାହିଁ ।
ଖବର ପାଇ ଦେବଗଡ଼ ବନଖଣ୍ଡ ଅଧିକାରୀ ମଗର ଧନଜୀ ରାଓସୋ, ବନ ବିଭାଗ ଅଧିକାରୀ ଓ ଅନ୍ୟ କର୍ମଚାରୀଙ୍କ ସହ ଘଟଣା ସ୍ଥଳରେ ପହଞ୍ଚି ହାତୀ ଶାବକକୁ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛନ୍ତି । ନଈକୂଳରେ ଥିବା ଦଳ ମଧ୍ୟରେ ପଡ଼ିଯିବା ହେତୁ ଶ୍ବାସରୁଦ୍ଧ ହୋଇ ହାତୀ ଶାବକର ମୃତ୍ୟୁ ଘଟିଥିବା ନେଇ ପ୍ରାଥମିକ ତଦନ୍ତରୁ ଜଣାପଡିଥିବା କହିଛନ୍ତି ବନଖଣ୍ଡ ଅଧିକାରୀ ଶ୍ରୀ ରାଓସୋ । ତେବେ ହାତୀ ଛୁଆଟିର କିଭଳି ମୃତ୍ୟୁ ହେଲା ତାହା ବ୍ୟବଚ୍ଚେଦ ପରେ ଜଣା ପଡିବୋଲି ବନବିଭାଗ ପକ୍ଷରୁ ସୂଚନା ରହିଛି ।
ଦେବଗଡ଼ରୁ ସରୋଜ ଶତପଥି, ଈଟିଭି ଭାରତ
