ଦେବଗଡ: ଅସୁରକ୍ଷିତ ଅବସ୍ଥାରେ ଚାଲିଛି ଅଙ୍ଗନବାଡି କେନ୍ଦ୍ର । ଅସ୍ବାସ୍ଥ୍ୟକର ପରିବେଶରେ ବସି ପାଠ ପଢୁଛନ୍ତି କୋମଳମତି ଶିଶୁ । ମନେହୁଏ ଯେପରି ସରକାରୀ ଯୋଜନା ସବୁ ଅକାମୀ ହୋଇପଡିଛି। ଏଥିପ୍ରତି ନା ବିଭାଗୀୟ କତ୍ତୃପକ୍ଷଙ୍କ ନା ସ୍ଥାନୀୟ ପ୍ରଶାସନର ଦୃଷ୍ଟି ଅଛି । ଏଭଳି ସମସ୍ୟା ଦେଖିବାକୁ ମିଳିଛି ଦେବଗଡ଼ ଜିଲ୍ଲା ବାରକୋଟ ବ୍ଲକର କୁମୁଦପାଲି ଅଙ୍ଗନବାଡି କେନ୍ଦ୍ରର । 2010 ମସିହାରେ ସରକାରଙ୍କ ସମନ୍ବିତ ଶିଶୁ ବିକାଶ ଯୋଜନା ଜରିଆରେ ଗାଁରେ ଏହି ଅଙ୍ଗନବାଡି କେନ୍ଦ୍ର ଖୋଲାଯାଇଥିଲା । ଏଠାରେ 14 ଜଣ ଶିଶୁ ପାଠ ପଢନ୍ତି । ହେଲେ ବିଡ଼ମ୍ବନାର ବିଷୟ ଯେ , ଏହି କେନ୍ଦ୍ରର ନିଜସ୍ବ ଗୃହଟିଏ ବି ନାହିଁ । ଏଥିପାଇଁ ଦୀର୍ଘ 10 ବର୍ଷ ଧରି ଏହି ଅସୁରକ୍ଷିତ ଅସ୍ଥାୟୀ କୁଡ଼ିଆରେ ଏହି ଅଙ୍ଗନବାଡି କେନ୍ଦ୍ର ଚାଲିଛି ।
ଖୋଲା ମୁକ୍ତ ଆକାଶ ତଳେ ଖରା, ବର୍ଷା ଓ ଶୀତ ପ୍ରତିଦିନ ଚଟାଣରେ ଅତ୍ୟନ୍ତ ଦୟନୀୟ ଭାବେ ବସି ପାଠ ପଢୁଛନ୍ତି ଛୋଟଛୋଟ କୋମଳମତି ଶିଶୁ । ଫଳରେ ଶିଶୁଙ୍କ ଶିକ୍ଷାଦାନ ପ୍ରକ୍ରିୟା ବାଧାପ୍ରାପ୍ତ ହେବା ସହିତ ସ୍ବାସ୍ଥ୍ୟ ଉପରେ ମଧ୍ୟ ଏହାର କୁପ୍ରଭାଵ ପଡୁଛି । 2016 ମସିହାରେ ସରକାର ଏହି କେନ୍ଦ୍ରର ସ୍ଥାୟୀ ଗୃହ ନିର୍ମାଣ ପାଇଁ ମହାତ୍ମାଗାନ୍ଧୀ ନିଶ୍ଚିତ କର୍ମନିଯୁକ୍ତି ଯୋଜନା ମାଧ୍ୟମରେ 7 ଲକ୍ଷ ଟଙ୍କା ବ୍ୟୟ ଅଟକଳ କରି ରମ୍ଭେଇ ଗ୍ରାମ ପଞ୍ଚାୟତକୁ ଏହାର କାର୍ଯ୍ୟାଦେଶ ହସ୍ତାନ୍ତର କରିଥିଲେ । ରମ୍ଭେଇ ପଞ୍ଚାୟତ ପକ୍ଷରୁ ଏହାର ନିର୍ମାଣ କାର୍ଯ୍ୟ ହାତକୁ ନିଆଯାଇଛି । ମାତ୍ର ଆଜିକୁ ଦୀର୍ଘ 4ବର୍ଷ ବିତିବାକୁ ବସିଥିଲେ ସୁଦ୍ଧା ଏ ପର୍ଯ୍ୟନ୍ତ ଗୃହର ନିର୍ମାଣ କାର୍ଯ୍ୟ ଶେଷ ହୋଇ ପାରିନାହିଁ । ବିଭାଗୀୟ କର୍ତ୍ତୃପକ୍ଷଙ୍କ ଚରମ ଅବହେଳା କାରଣରୁ ଏହାର ନିର୍ମାଣ କାର୍ଯ୍ୟ ନିର୍ଦ୍ଧାରିତ ସମୟରେ ସମାପ୍ତ ହେଇ ପାରୁନାହିଁ । ଏଥିସହିତ ଏହି ଗୃହର ନିର୍ମାଣ କାର୍ଯ୍ୟ ମଧ୍ୟ ଅତ୍ୟନ୍ତ ନିମ୍ନମାନର ହେଉଥିବା ଅଭିଯୋଗ ହେଉଛି । ଫଳରେ ଆଜକୁ ଦୀର୍ଘବର୍ଷ ହେଲା ଶିଶୁମାନେ ଏଭଳି ଅସୁରକ୍ଷିତ ଅସ୍ଥାୟୀ କୁଡ଼ିଆରେ ବସି ପାଠ ପଢିବାକୁ ବାଧ୍ୟ ହେଉଛନ୍ତି ।
ଶିଶୁଙ୍କ ଶାରୀରିକ, ମାନସିକ ଓ ବୌଦ୍ଧିକ ବିକାଶ କରିବା ଲକ୍ଷ୍ୟରେ ସରକାର କାର୍ଯ୍ୟକାରୀ କରିଛନ୍ତି ସମନ୍ବିତ ଶିଶୁ ବିକାଶ ଯୋଜନା । ତେବେ ଦେବଗଡ଼ ଜିଲ୍ଲାର କୁମୁଦପାଲି ଗାଁରେ ଥିବା ଏହି ଅଙ୍ଗନବାଡି କେନ୍ଦ୍ରର ଅବସ୍ଥା ଦେଖିଲେ ସରକାରଙ୍କ ଏହି ଯୋଜନା ଜିଲ୍ଲାରେ ଲକ୍ଷ୍ୟଚ୍ୟୁତ ହୋଇଥିବା ଭଳି ମନେହେଉଛି ।
ଦେବଗଡରୁ ସରୋଜ ଶତପଥୀ, ଇଟିଭି ଭାରତ
