ଭଦ୍ରକ: ଲ୍ୟାଣ୍ଡଫଲ କଲା ଏବଂ ଅନେକଙ୍କ ମନରେ କ୍ଷତ ଭରିଦେଲା ବାତ୍ୟା ୟସ। ବହୁ କ୍ଷୟକ୍ଷତି କଲା । କେଉଁଠି ଗଛ ଭାଙ୍ଗିଲା ତ ଆଉ କେଉଁଠି ବିଦ୍ୟୁତ ଖୁଣ୍ଟକୁ ତଳେ ସୁଆଇଦେଲା । ଆଉ କେଉଁଠି କାରକୁ ପାଣିରେ ଭସାଇ ନେଲା ଓ ଘର ଗୁଡିକୁ ପାଣିରେ ବୁଡ଼ାଇ ଦେଲା । ଏମିତି ସ୍ଥିତି ଏବେ ଭଦ୍ରକ ଜିଲ୍ଲାରେ ବାତ୍ୟା ୟସ ପରେ ଦେଖିବା ପାଇଁ ମିଳିଛି । ବାତ୍ୟା ୟସ ବାରମ୍ବାର ଦିଗ ବଦଳାଇଥିଲା । ପାଣିପାଗ ବିଭାଗର ପ୍ରାଥମିକ ଆକଳନରେ ଭଦ୍ରକ ଜିଲ୍ଲା ଧାମରାରୁ ବାସୁଦେବପୁର ଅଞ୍ଚଳରେ ଲ୍ୟାଣ୍ଡଫଲ କରିଥାନ୍ତା ବାତ୍ୟା ୟସ । କିନ୍ତୁ ପୁଣି ଦିଗ ବଦଳାଇ ଭଦ୍ରକ ଜିଲ୍ଲାରେ ସିନା ଲ୍ୟାଣ୍ଡଫଲ କଲା ନାହିଁ, କିନ୍ତୁ ଜିଲ୍ଲାର ପ୍ରାୟ ସମସ୍ତ ବ୍ଲକରେ ପ୍ରଭୃତ କ୍ଷୟକ୍ଷତି କରିଛି ।
ଧାମରା, ଚାନ୍ଦବାଲି, ବାସୁଦେବପୁର ଓ ତିହିଡି ବ୍ଲକରେ ଅଧିକ କ୍ଷତି ହୋଇଥିବା ସୂଚନା ମିଳିଛି । କିନ୍ତୁ ରାଜ୍ୟ ସରକାରଙ୍କ ନିର୍ଦ୍ଦେଶ ଓ ଜିଲ୍ଲା ପ୍ରଶାସନର ଆବଶ୍ୟକ ପଦକ୍ଷେପ ପାଇଁ ଜୀବନ ହାନି ହୋଇନାହିଁ । ବାତ୍ୟାକୁ ନଜରରେ ରଖି ଜିଲ୍ଲା ପ୍ରଶାସନ ତରଫରୁ ସମଗ୍ର ଜିଲ୍ଲାର 1 ଲକ୍ଷ 20 ହଜାରରୁ ଅଧିକ ଲୋକଙ୍କୁ ତଳିଆ ଅଞ୍ଚଳରୁ ସ୍ଥାନାନ୍ତର କରି ସ୍ଥାୟୀ ଓ ଅସ୍ଥାୟୀ ଆଶ୍ରୟସ୍ଥଳୀରେ ଥଇଥାନ କରାଯାଇଛି । ସ୍ଥାନାନ୍ତର ପରେ ଶୁଖିଲା ଓ ରନ୍ଧା ଖାଦ୍ୟ ଯୋଗାଇ ଦିଆଯାଇଛି । ଜିଲ୍ଲାର ଅନେକ ସ୍ଥାନରେ ଗଛ ପଡିଛି, ବିଦ୍ୟୁତ ଖୁଣ୍ଟ ଭାଙ୍ଗି ମାଟି ଛୁଇଁଛି । ଅନେକ ସ୍ଥାନରେ ଘର ଉପରେ ଗଛ ପଡିଥିବାବେଳେ ବର୍ଷା ଯୋଗୁଁ ବହୁ ଅଞ୍ଚଳରେ ଘର ଗୁଡିକ ଜଳମଗ୍ନ ହୋଇଛି ।
ତିହିଡି ବ୍ଲକ ଗୁଆମାଳ ଠାରେ ଗଛ ପଡି ସ୍ବାସ୍ଥ୍ୟ କେନ୍ଦ୍ରର ପାଚେରୀ ଭାଙ୍ଗି ରାସ୍ତା ଅବରୋଧ ହାଇଥିଲା । ଭଦ୍ରକ ସହରର 18 ନମ୍ବର ୱାର୍ଡରେ ବର୍ଷା ପାଣିରେ ବାଟ ନ ପାଇ ବୋଲେରୋ ଦୁର୍ଘଟଣା ହୋଇଛି । ସେହିପରି ପ୍ରାୟ 7ଟି ବ୍ଲକର ତଳିଆ ଅଞ୍ଚଳରେ ବର୍ଷା ପାଣି ବନ୍ୟା ଭଳି ପରିସ୍ଥିତି ସୃଷ୍ଟି କରିଛି । ତେବେ ଜିଲ୍ଲାରେ ମୁତୟନ ହୋଇଥିବା 15 ପ୍ଲାଟୁନ ପୋଲିସ ଫୋର୍ସ ସହ ସମସ୍ତ ଥାନାର କର୍ମଚାରୀ ମାନେ ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି। ସେହିଭଳି 10ଟି ଏନଡିଆରଏଫ ଟିମ, 3 ଓଡ୍ରାଫ ଟିମ ଓ 20 ଅଗ୍ନିଶମ ବାହିନୀ ଏବେ ଗଛ କଟା, ରାସ୍ତା ସଫା କରିବା କାର୍ଯ୍ୟ କରୁଥିବା ବେଳେ ବିଦ୍ୟୁତ ବିଭାଗ ବିଦ୍ୟୁତ ସଂଯୋଗ ପାଇଁ ନିଜ କାର୍ଯ୍ୟ ଆରମ୍ଭ କରିଛି । ପାଣି ଜମିଥିବା ସ୍ଥାନରୁ ବର୍ଷା ଜଳ ନିଷ୍କାସନ ପାଇଁ କାର୍ଯ୍ୟ ଆରମ୍ଭ ହୋଇଛି ।
ଏମିତି ସମୟରେ ପିଇବା ପାଣି ଯୋଗାଇବା ସହ ବିଦ୍ୟୁତ ସଂଯୋଗ ବିଚ୍ଛିନ୍ନ ହୋଇଥିବା ଅଞ୍ଚଳରେ ଜେନେରେଟର ଓ ଅନ୍ୟ ବିକଳ୍ପ ବ୍ୟବସ୍ଥା କରି ଅଲୋକୀକରଣ ପାଇଁ ଚେଷ୍ଟା ଆରମ୍ଭ ହୋଇଛି । କ୍ଷୟକ୍ଷତିର ଆକଳନ ପରେ ଜିଲ୍ଲାରେ କେତେ ମାତ୍ରାରେ କ୍ଷତି କରିଛି ୟସ ତାହା ସ୍ପଷ୍ଟ ହେବ। ତେବେ ଜିଲ୍ଲାପାଳ କହିଛନ୍ତି ବିଦ୍ୟୁତ ସଂଯୋଗ ପାଇଁ କାର୍ଯ୍ୟ ଆରମ୍ଭ ହୋଇଛି, ଯଥାଶୀଘ୍ର କାର୍ଯ୍ୟ ସରିବ । ଟ୍ୟାଙ୍କର ଯୋଗେ ପାଣି ଯୋଗାଇବା ନିମନ୍ତେ ବ୍ୟବସ୍ଥା କରାଯାଉଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
