ନିଆଳୀ: ସ୍କୁଲ୍ ନିକଟରେ ରାଜନୈତିକ ଦଳୀୟ ସମାବେଶର ହେଲା ଆୟୋଜନ । ଫଳରେ ପାଠପଢ଼ା ଛାଡ଼ି ନେତାଙ୍କ ଭାଷଣ ଶୁଣିଲେ ଛାତ୍ରୀ । କଟକ ଜିଲ୍ଲା କଣ୍ଟାପଡ଼ା ବ୍ଲକ ପୋସ୍ତଳ ପଞ୍ଚାୟତରେ ଏଭଳି ଏକ ଦୃଶ୍ୟ ଦେଖିବାକୁ ମିଳିଥିଲା । ପୋସ୍ତଳ ପଞ୍ଚାୟତ ରମ୍ଭା ମଦନମୋହନ ମନ୍ଦିର ପରିସରରେ ବିଜେଡିର ଏକ ବୈଠକ ଆୟୋଜନ ହୋଇଥିଲା । ପୋସ୍ତଳ ପଞ୍ଚାୟତରେ ବିଜେଡିର ପଦଯାତ୍ରା ପରେ ଏହି ବୈଠକର ଆୟୋଜନ କରାଯାଇଥିଲା ।
ମନ୍ଦିରକୁ ଲାଗି ପଞ୍ଚାୟତରାଜ ହାଇସ୍କୁଲ ରହିଛି । ଦଳୀୟ ସମାବେଶରେ ଯୋଗ ଦେଇଥିବା ନେତାଏ ମାଇକ୍ରେ ଭାଷଣ ଦେବା ଆରମ୍ଭ କରିଥିଲେ । ଫଳରେ ସ୍କୁଲ୍ରେ ପାଠପଢ଼ୁଥିବା ଛାତ୍ରଛାତ୍ରୀଙ୍କ ପାଠପଢ଼ାରେ ବ୍ୟାଘାତ ଦେଖା ଦେଇଥିଲା । ଶେଷରେ ପାଠପଢା ଛାଡ଼ି ପିଲାଏ ଝରକା ଦେଇ ନେତାଙ୍କ ଭାଷଣ ଶୁଣିବା ଆରମ୍ଭ କରିଥିଲେ । ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି ।
ସ୍କୁଲ୍ ନିକଟରେ ଏଭଳି ସଭା ସମିତିର ଆୟୋଜନକୁ ସୋସିଆଲ ମିଡିଆ ୟୁଜର୍ସ ନାପସନ୍ଦ କରିଛନ୍ତି । ଏଭଳି ସଭା ସମିତି ପାଇଁ ଅନୁମତି ନଦେବାକୁ ଦାବି କରିଛନ୍ତି ସ୍ଥାନୀୟ ଲୋକେ । କଣ୍ଟାପଡ଼ା ବ୍ଲକ ପୋସ୍ତଳ ପଞ୍ଚାୟତରେ ଆୟୋଜିତ ବିଜେଡି ସମାବେଶରେ ନିଆଳି ବିଧାୟକ ପ୍ରମୋଦ ମଲ୍ଲିକଙ୍କ ସମେତ ଜିଲ୍ଲାପରିଷଦ, ସରପଞ୍ଚ, ସମିତି ସଭ୍ୟ ଏବଂ କର୍ମୀ ଉପସ୍ଥିତ ରହିଥିଲେ । ଅନ୍ୟାନ କର୍ମୀଙ୍କ ଉପସ୍ଥିତିରେ ଏହି ବୈଠକ ସମ୍ପନ୍ନ ହୋଇଥିଲା ।
