କଟକ: ଏସସିବିରେ ପହଁଞ୍ଚି ଜଗା ବଳିଆର ସ୍ବାସ୍ଥ୍ୟାବସ୍ଥା ପରିଖିଛନ୍ତି ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ । ଏସିବି ଗସ୍ତ ପରେ ସେ କହିଛନ୍ତି ଯେ ଜଗାର ମାନସିକ ବିକାଶର ଆବଶ୍ୟକତା ରହିଛି । ମେଡିକାଲ ପରିବେଶ ସେତେଟା ଭଲ ନୁହେଁ । ଖେଳିବା ସାମଗ୍ରୀ, ଘରୋଇ ପରିବେଶ, ବାପା ମାଙ୍କ ସ୍ନେହ, ପାଠ ପଢ଼ିବା ସହ ତାର ଅନ୍ୟାନ୍ୟ ଆବଶ୍ୟକତା ମଧ୍ୟ ରହିଛି । ବର୍ତ୍ତମାନ ସ୍ଥିତିରେ ଜଗା ସୁସ୍ଥ ଅଛି ଆଉ ବଳିଆର ସ୍ବାସ୍ଥ୍ୟାବସ୍ଥା ସାମାନ୍ୟ ଖରାପ ରହିଛି । ତେବେ ଆଗାମୀ ଦିନରେ ବଳିଆ ସୁସ୍ଥ ହେବାର ଆଭାସ ମିଳୁଛି ବୋଲି କହିଛନ୍ତି ସେ ।
ଯେପରି ଉଭୟ ଶୀଘ୍ର ସୁସ୍ଥ ହେବେ ସେନେଇ ମେଡିକାଲ ଟିମ ଓ ସୁପରଟେଣ୍ଡେଣ୍ଟଙ୍କ ସହ ବିଧିବଦ୍ଧ ଭାବେ ଆଲୋଚନା କରିଛନ୍ତି ଅଧକ୍ଷା । ତେବେ ବର୍ତ୍ତମାନ କାଳିଆର ସ୍ବାସ୍ଥ୍ୟାବସ୍ଥା ଭଲ ନାହିଁ । ଏମସ୍ର କହିବା ଅନୁସାରେ ମେଡିକାଲ ଟିମ ଉନ୍ନତ ମାନର ଚିକିତ୍ସା ଯୋଗାଇ ଦେଉଛନ୍ତି । ତେବେ ଉଭୟଙ୍କ ମାନସିକ ବିକାଶ ହେବାର ଆଵଶ୍ୟକତା ରହିଛି । ଜଗାକୁ ବର୍ତ୍ତମାନ 4 ବର୍ଷ ହୋଇଥିବା ବେଳେ ଆଉ ଗୋଟେ ବର୍ଷ ପରେ ତାର ପାଠପଢ଼ା କାର୍ଯ୍ୟ ଆରମ୍ଭ କରିବା ଦରକାର ବୋଲି କହିଛନ୍ତି ଅଧ୍ୟକ୍ଷା ।
ଜଗା ପାଇଁ ଆଉ ବେଶୀଦିନ ମେଡିକାଲ ପରିସର ମଧ୍ୟ ଠିକ ନୁହେଁ । ତେବେ ମୋଟାମୋଟି କହିବାକୁ ଗଲେ ଆଗାମୀ ଦିନରେ ଆୟୋଗ ପକ୍ଷରୁ ଉଭୟଙ୍କ ପାଇଁ ନିଶ୍ଚିତ ସକାରାତ୍ମକ କାର୍ଯ୍ୟପନ୍ଥା ଗ୍ରହଣ କରାଯିବ ବୋଲି କହିଛନ୍ତି ଶିଶୁ ସୁରକ୍ଷା ଅଧିକାର ଆୟୋଗ ଅଧକ୍ଷା ସନ୍ଧ୍ୟାବତୀ ପ୍ରଧାନ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
