କଟକ: ଶ୍ରୀମନ୍ଦିର ଜଗମୋହନ ମରାମତି ପ୍ରସଙ୍ଗ । ମାମଲାର ଶୁଣାଣି କରି ପୂର୍ଣ୍ଣାଙ୍ଗ ସତ୍ୟପାଠ ଦାଖଲ କରିବାକୁ ହାଇକୋର୍ଟ ଏଏସଆଇକୁ ନିର୍ଦ୍ଦେଶ ଦେଇଛନ୍ତି । ୨୦୧୭ ମସିହାରୁ ବର୍ତ୍ତମାନ ପର୍ଯ୍ୟନ୍ତ ଶ୍ରୀମନ୍ଦିର ଜଗମୋହନ ନାଟମଣ୍ଡପ, ରତ୍ନଭଣ୍ଡାର ମରାମତି ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ସତ୍ୟପାଠ ଜରିଆରେ ଜଣାଇବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଆସନ୍ତା ୧୫ ତାରିଖରେ ମାମଲାର ପରବର୍ତ୍ତୀ ଶୁଣାଣୀ ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି । ଅଭିଷେକ ଦାସ ଓ ଦିଲ୍ଲୀପ ମହାପାତ୍ରଙ୍କ ଆବେଦନ ଉପରେ ଶୁଣାଣି କରି କୋର୍ଟ ଏହି ନିର୍ଦ୍ଦେଶ ଦେଇଛନ୍ତି ।
ଜଗମୋହନ ଓ ନାଟ ମଣ୍ଡପର ମରାମତି ବିଳମ୍ବକୁ ନେଇ ପୂର୍ବ ଶୁଣାଣିରେ ଗଭୀର ଅସନ୍ତୋଷ ପ୍ରକାଶ କରିଥିଲେ କୋର୍ଟ । କାହିଁକି ଏହାର ମରାମତି ବିଳମ୍ବିତ କରାଯାଉଛି ବୋଲି ହାଇକୋର୍ଟ ପ୍ରଶ୍ନ କରିବା ସହ, ଏଏସଆଇ ଉପରେ ବିରକ୍ତି ପ୍ରକାଶ କରିଥିଲେ । ଏଥିସହ କାହିଁକି ପୂର୍ବ ନିର୍ଦ୍ଦେଶ କାର୍ଯ୍ୟକାରୀ ହୋଇ ନାହିଁ ସେ ନେଇ ମଧ୍ୟ ଜବାବ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ । ଶ୍ରୀମନ୍ଦିର ଜଗମୋହନ ଏବଂ ନାଟ ମଣ୍ଡପ ମରାମତି ମାମଲାର କାର୍ଯ୍ୟ ସମ୍ପର୍କରେ ବିସ୍ତୃତ ରିପୋର୍ଟ ମାଗିଥିଲେ ହାଇକୋର୍ଟ । 2017 ମସିହାରୁ ଆଜି ପର୍ଯ୍ୟନ୍ତ କଣ କଣ ପଦକ୍ଷେପ ନିଆଯାଇଛି ସେନେଇ ଜଣାଇବାକୁ କୋର୍ଟ ମଧ୍ୟ ନିର୍ଦ୍ଦେଶ ଦେଇଥିଲେ ।
ଅଧିକ ପଢନ୍ତୁ- Jagannath Temple Issue: ଜଗମୋହନ ଓ ନାଟ ମଣ୍ଡପର ମରାମତି ବିଳମ୍ବ, ଅସନ୍ତୋଷ ପ୍ରକାଶ କଲେ କୋର୍ଟ
ଶ୍ରୀମନ୍ଦିର ସୁରକ୍ଷା ମାମଲା । ନାଟ ମଣ୍ଡପ ସୁରକ୍ଷା ନେଇ ଆଇଆଇଟି ମାଡ୍ରାସକୁ ମତାମତ ମଗାଯାଇଛି । ନାଟ ମଣ୍ଡପ ବିମର ଡିଜାଇନ ଦେବ ଆଇଆଇଟି ମାଡ୍ରାସ । ଆଇଆଇଟି ମାଡ୍ରାସରୁ ଆସି ନାହିଁ ରିପୋର୍ଟ । ଅକ୍ଟୋବର ୧୫ ସୁଦ୍ଧା ସମସ୍ତ ପ୍ରକ୍ରିୟା ଶେଷ କରିବାକୁ କୋର୍ଟ ଏଏସଆଇ ନିର୍ଦ୍ଦେଶ ଦେଇଥିଲେ । ସେହିପରି ରତ୍ନଭଣ୍ଡାର ମାମଲାରେ ଆବେଦନକାରୀଙ୍କ ପକ୍ଷରୁ ହାଇକୋର୍ଟରେ ପ୍ରତି ଜବାବ ଦାଖଲ କରାଯାଇଥିଲା ।
ଅନ୍ୟପଟେ ଶ୍ରୀଜଗନ୍ନାଥଙ୍କ ରତ୍ନଭଣ୍ଡାରରେ ଥିବା ଅଳଙ୍କାର ଯାଞ୍ଚକୁ ନେଇ ପୁଣି ଉଠିଲା ପ୍ରଶ୍ନ । ହାଇକୋର୍ଟରେ ଆବେଦନକାରୀ ଓକିଲଙ୍କ ପକ୍ଷରୁ ଏ ସମ୍ପର୍କିତ ଦାଖଲ ହୋଇଥିବା ପ୍ରତିଜବାବକୁ ନେଇ ଏବେ ଆରମ୍ଭ ହୋଇଯାଇଛି ଚର୍ଚ୍ଚା । ଦୀର୍ଘ ୪୫ ବର୍ଷ ଧରି କାହିଁକି ଖୋଲି ନାହିଁ ରତ୍ନଭଣ୍ଡାର ? କାହିଁକି ରତ୍ନଭଣ୍ଡାରରେ ଥିବା ଅଳଙ୍କାରର କୌଣସି ହିସାବ କିତାବ ହୋଇନାହିଁ ? ସେନେଇ ଆବେଦନକାରୀ ହାଇକୋର୍ଟରେ ପ୍ରତି ଜବାବ ଦାଖଲ କରିଛନ୍ତି ।
ଶ୍ରୀଜଗନ୍ନାଥ ମନ୍ଦିର ଆକ୍ଟ ୧୯୫୫ର ସେକ୍ସନ ୯ ଏବଂ ଶ୍ରୀ ଜଗନ୍ନାଥ ମନ୍ଦିର ରୁଲ ୧୯୬୦ ର ରୁଲ ୫କୁ ଖୋଲାଖୋଲି ଉଲ୍ଲଂଘନ କରାଯାଇଥିବା ନେଇ ଆବେଦନକାରୀ ପ୍ରତି ଜବାବରେ କୋର୍ଟଙ୍କୁ ଅବଗତ କରାଇଛନ୍ତି । ଶ୍ରୀଜଗନ୍ନାଥ ମନ୍ଦିର ଆକ୍ଟ ୧୯୫୫ ର ସେକ୍ସନ ୯ ଅନୁସାରେ ପ୍ରତି ୩ ବର୍ଷରେ ଥରେ କମିଟି ଗଠନ ହେବା କଥା । ଏହି ଆଇନ ଅନୁଯାୟୀ ସେହି କମିଟିର ପୁନର୍ଗଠନ କରିବା କଥା । ୧୮ ଜଣିଆ ଏହି କମିଟିରେ ଗଜପତି ମହାରାଜା ଅଧ୍ୟକ୍ଷ ଥିବା ବେଳେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଏହାର କାର୍ଯ୍ୟକାରୀ ଅଧ୍ୟକ୍ଷ ଭାବେ ରହିବା ନିୟମ ରହିଛି ।
ସେହିପରି ଶ୍ରୀଜଗନ୍ନାଥ ମନ୍ଦିର ରୁଲ ୧୯୬୦ର ରୁଲ ୫ ଅନୁସାରେ ଗଠନ ବା ପୁନର୍ଗଠନ ହୋଇଥିବା କମିଟି,ମନ୍ଦିର ବାହାର, ଭିତର ଓ ଚଳନ୍ତି ରତ୍ନଭଣ୍ଡାରର ସମସ୍ତ ରତ୍ନ ଅଳଙ୍କାର ଯାଞ୍ଚ କରି ତାକୁ ନିଜ ଦଖଲକୁ ନେବା କଥା । ମାତ୍ର ୧୯୭୮ ମସିହା ପର ଠାରୁ ଆଉ ରତ୍ନଭଣ୍ଡାର ଖୋଲା ଯାଇନାହିଁ କି ରତ୍ନ ଅଳଙ୍କାରର କୌଣସି ଯାଞ୍ଚ କରାଯାଇ ନାହିଁ। ରତ୍ନଭଣ୍ଡାର କେତେ ସୁରକ୍ଷିତ ଅଛି ? ରତ୍ନ ଅଳଙ୍କାର କେତେ ସୁରକ୍ଷିତ ଅଛି ସେ ନେଇ କୌଣସି ସଠିକ ତଥ୍ୟ ନଥିବା କୋର୍ଟଙ୍କୁ ନିଜର ପ୍ରତି ଜବାବ ରେ ଅବଗତ କରିଛନ୍ତି ଆବେଦନକାରୀଙ୍କ ଓକିଲ।
ଇଟିଭି ଭାରତ, କଟକ
