କଟକ: ଜଗତଜନନୀ ମା’ ଦୁର୍ଗତିନାଶିନୀ ଦୁର୍ଗାଙ୍କ ମହା ଆଡମ୍ବରରେ ପାଳନ ହେଉଛି ମହା ନବମୀ ପୂଜା । ହୋମଯଜ୍ଞ, ମନ୍ତ୍ରପାଠରେ କମ୍ପୁଛି ପୁରପଲ୍ଲୀ । ସହରରେ ସୃଷ୍ଟି ହୋଇଛି ଭକ୍ତିମୟ ପରିବେଶ । ତେବେ ମହାନବମୀରେ କୁମାରୀ ପୂଜାର ରହିଛି ବିଶେଷ ପରମ୍ପରା । କଟକ ହରିପୁର ଦୋଳମୁଣ୍ଡାଇ ପୂଜା ମଣ୍ଡପରେ ଏହି ପୂଜାକୁ ନିଆରା ଭାବରେ କରାଯାଇଛି। ମା’ଙ୍କ ଏହି ନଅ ରୂପକୁ ଦର୍ଶନ କଲେ ମନସ୍କାମନା ପୂରଣ ହୋଇଥାଏ ବିଶ୍ବାସ ରହିଛି।
ନବମୀ ପୂଜାରେ କୁମାରୀ ପୂଜାର ବିଧି ରହିଛି । ବିଧି ଅନୁଯାୟୀ 9 ଜଣ ଶିଶୁକନ୍ୟାଙ୍କ ପ୍ରଥମେ ପାଦ ଧୌତ କରି ସେମାନଙ୍କୁ ମା’ଙ୍କ ବେଶରେ ସଜା ଯାଇଥାଏ । ଏହାପରେ ନୂତନ ବସ୍ତ୍ର ପିନ୍ଧାଇ ସେମାନଙ୍କ ପାଦରେ ଅଳତା ଲଗାଯାଇଥାଏ ଓ ଫୁଲ ମାଳ ପିନ୍ଧାଯାଇ ପୂଜାର୍ଚ୍ଚନା କରାଯାଇଥାଏ। ମା’ଙ୍କ ନଅ ରୂପରେ ନବମୀ ଦିନ କୁମାରୀ ପୂଜା କରାଯିବାର ବିଧି ରହିଛି। କଟକ ଦୋଳମୁଣ୍ଡାଇ ପୂଜା ମଣ୍ଡପ ଏହି ପୂଜାକୁ ପ୍ରତ୍ୟକ ବର୍ଷ ନିଆରା ଭାବରେ କରିଥାଏ ।
ଅନ୍ୟପଟେ ଏହି ନବମୀ ପୂଜାରେ କୁମାରୀ ପୂଜା ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ବେଶ ଆଗ୍ରହ ଦେଖିବାକୁ ମିଳିଥାଏ । ଏହି ଦିନରେ ମାଙ୍କ 9 ରୂପକୁ ଦର୍ଶନ କଲେ ପୁଣ୍ୟ ମିଳିଥାଏ ବୋଲି ବିଶ୍ବାସ କରନ୍ତି ଭକ୍ତ। ସେଥିଲାଗି ଏହି କୁମାରୀ ପୂଜା ସମୟରେ ଶ୍ରଦ୍ଧାଳୁ ମାନେ, କୁମାରୀ ମାନଙ୍କୁ ଦାନ ଦେଇ ଆଶୀର୍ବାଦ ସାଉଁଟି ଥାଆନ୍ତି। ଖାତା, କଲମ, ଚକୋଲେଟ, ବିଭିନ୍ନ ପ୍ରକାର ଖାଦ୍ୟ, ଟଙ୍କା ଆଦି କୁମାରୀମାଙ୍କୁ ଦାନ କରି ସେମାନଙ୍କ ପାଦ ସ୍ପର୍ଶ କଲେ ମନସ୍କାମନା ପୂରଣ ହୋଇଥାଏ ବୋଲି ବିଶ୍ବାସ ରହିଛି। ପୌରାଣିକ କଥା ଅନୁଯାୟୀ ମହାଷ୍ଟମୀରେ ପ୍ରତାପ ଦୈତ୍ୟ ମହିଷାସୁରକୁ ବଦ୍ଧ କରିବା ପରେ ନବମୀ ଦିନ ମାଆ ଦେବ ଓ ନର ଲୋକଙ୍କୁ ସିଦ୍ଧି ପ୍ରଦାନ କରିଥିଲେ।
କଟକରୁ ନାରାୟଣ ସାହୁ, ଇଟିଭି ଭାରତ
