କଟକ: କଟକର ମାତା ମଠ ନିକଟରେ ଦୁର୍ଘଟଣା । ଗୋଟିଏ କାର ଏକ ଅଟୋକୁ ଧକ୍କା ଦେବା ଫଳରେ ଅଟୋରେ ଥିବା ସମସ୍ତ ଯାତ୍ରୀ ଗୁରୁତର ଆହତ ହୋଇଛନ୍ତି । ଆହତ ଯାତ୍ରୀଙ୍କୁ ଏସସିବି ମେଡିକାଲରେ ଭର୍ତ୍ତି କରାଯାଇଛି ।
ସୂଚନାମୁତାବକ, କାର ଡ୍ରାଇଭର ଜଣକ ମଦ୍ୟପାନ କରି ଦ୍ରୁତଗତିରେ କାର ଚଳାଉଥିବା ଜଣାପଡିଛି । ତେବେ ଗାଡିର ବେଗ ୧୦୦ରୁ ଅଧିକ ଥିବାଯୋଗୁଁ ଗାଡିଟି ନିୟନ୍ତ୍ରଣ ହରାଇ ଏକ ଅଟୋ ପଛପଟେ ପିଟିହୋଇଥିଲା । ଫଳରେ ଘଟଣାସ୍ଥଳରେ ଅଟୋଟି ଓଲଟି ପଡିଥିବାବେଳେ ଅଟୋ ଚାଳକଙ୍କ ସମେତ ସମସ୍ତ ଯାତ୍ରୀ ଗୁରୁତର ହୋଇଛନ୍ତି ।
ତେବେ ଆହତ ସମସ୍ତ ଯାତ୍ରୀ କଟକ ପୀର ବଜାରର ଗୋଟିଏ ପରିବାରର ବୋଲି ଜଣାପଡିଛି । ତେବେ ସେମାନଙ୍କ ଭିତରେ ଏକ ଶିଶୁ ରହିଥିବା ଜଣାପଡିଛି । ଅନ୍ୟପଟେ ମଦ୍ୟପ ଡ୍ରାଇଭର ନିଜ ବାନ୍ଧବୀଙ୍କୁ ସାଥୀରେ ଧରି ଦ୍ରୁତଗତିରେ ଗାଡି ନେଉଥିଲେ । ଦୁର୍ଘଟଣା ପରେ ଲୋକେ କାବୁ କରି ମାଡ ମାରିଥିବାବେଳେ ଖବରପାଇ ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କ କବଳରୁ ଅଭିଯୁକ୍ତ ଡ୍ରାଇଭରକୁ ଉଦ୍ଧାର କରି ଅଟକ ରଖିଛି । ଗାଡି ଭିତରୁ ଏକ ମଦ ବୋତଲ ମିଳିଥିବାବେଳେ, ଦୁର୍ଘଟଣାରେ କାର ଓ ଅଟୋ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
