କଟକ: ପୋଲିସ କବ୍ଜାରେ ସାଇକୋ କିଲର୍ । ହେଲେ କଟକରେ ଏହି ସିରିଏଲ ହତ୍ୟାକାଣ୍ଡର ନାରାୟଣ ସାହୁ ପ୍ରକୃତ ହତ୍ୟାକାରୀ କି ନୁହେଁ? ଏ ସବୁ ପ୍ରଶ୍ନ ଉପରୁ ପୋଲିସ ପରଦା ହଟାଇବା ପାଇଁ ଜୋରଦାର ଖୋଳତାଡ କରୁଛି । ଏନେଇ ଗୁରୁବାର ଘଟଣାସ୍ଥଳ ଯାଞ୍ଚ କରିଛି ଫରେନସିକ୍ ଟିମ । ଓଏମପି୍ ଛକ ଠାରେ ଘଟିଥିବା ହତ୍ୟାକାଣ୍ଡ ସ୍ଥଳରେ ପୋଲିସ ଓ ଫରେନସିକ୍ ଟିମ ପହଞ୍ଚି ତନ୍ନତନ୍ନ କରି ଯାଞ୍ଚ କରିଛି । ଯାଞ୍ଚ ସ୍ଥଳକୁ କିଲର୍ ନାରାୟଣ ସାହୁକୁ ନେଇଛି ପୋଲିସ ।
ଓଏମପି ଛକରେ ଯେଉଁଠି ନାରାୟଣ ସାହୁ ରହୁଥିଲା, ସେଠାକୁ ନାରାୟଣକୁ ନେଇ ପୋଲିସ ଖୋଳତାଡ଼ କରିଛି । ନାରାୟଣ ଯେଉଁ ସାର୍ଟ, ପ୍ୟାଣ୍ଟ, ଗାମୁଛା ଓ ହତ୍ୟା ପାଇଁ ଯେଉଁ ଅସ୍ତ୍ର ବ୍ୟବହାର କରିଥିଲା, ତାହାକୁ ଏକ ଅଳିଆ ଗଦା ଭିତରେ ରଖିଥିବା ଖବର ମିଳିଥିଲା । ପୋଲିସ ଉପସ୍ଥିତିରେ ସେହି ଅଳିଆ ଗଦାରୁ ନାରାୟଣ ଏ ସମସ୍ତ ବ୍ୟବହୃତ ସାମଗ୍ରୀକୁ ବାହାର କରିଥିଲା। ଏହାସହ ସେ ହତ୍ୟାକାଣ୍ଡ ସମୟରେ ବ୍ୟବହାର କରିଥିବା ସାମଗ୍ରୀକୁ ସାଇଟିଫିକ୍ ଟିମ ଜବତ କରିଛି । ଏହି ସିରିଏଲ ହତ୍ୟାକାଣ୍ଡରେ ଓଏମପି ଛକ ହତ୍ୟା ଘଟଣାରେ ନାରାୟଣ ସମ୍ପୃକ୍ତ ଥିବା ପୋଲିସ ଆଗରେ ସ୍ବୀକାର କରିଥିବା ସୂଚନା ମିଳିଛି । ଅନ୍ୟ ଦୁଇଟିରେ ପୋଲିସ ନାରାୟଣ ସାହୁକୁ ଘନ ଘନ ପଚାର-ଉଚୁରା କରୁଥିବାବେଳେ ନାରାୟଣ ମୁହଁ ଖୋଲୁ ନଥିବା ସୂଚନା ମିଳିଛି ।
ଅନ୍ୟପଟେ ପୋଲିସର ଦ୍ଵାରସ୍ତ ହୋଇଛନ୍ତି ସାଇକୋ କିଲର ନାରାୟଣ ସାହୁଙ୍କ ପତ୍ନୀ । ଏହାସହ ତାଙ୍କ ସ୍ଵାମୀଙ୍କୁ ଫସେଇ ଦିଆଯାଇଥିବା ଅଭିଯୋଗ କରିଛନ୍ତି ।
ଏଠାରେ ସୂଚନାଯୋଗ୍ୟ, କଟକରେ ତିନିଟି ହତ୍ୟାକାଣ୍ଡ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା । ଏହାପରେ ସିସିଟିଭି ଫୁଟେଜ ଓ ଫରେନ୍ସିକ୍ ରିପୋର୍ଟ ଆଧାରରେ ହତ୍ୟାକାରୀ ନାରାୟଣକୁ ଚିହ୍ନଟ କରାଯାଇଥିଲା । ପରେ ପୋଲିସ ସିରିଆଲ୍ କିଲର ନାରାୟଣକୁ ନୟାଗଡ଼ରୁ ଗିରଫ କରିଛି।
କଟକରୁ ନାରାୟଣ ସାହୁ, ଇଟିଭି ଭାରତ
