କଟକ: ଚୌଦ୍ବାର ଜେଲରେ ବିଚାରଧୀନ କଏଦୀଙ୍କ ସନ୍ଦେହଜନକ ମୃତ୍ୟୁ । ମୃତ କଏଦୀ ହେଲେ ନୟାଗଡ଼ ଅଞ୍ଚଳର ଦେବପ୍ରକାଶ ବେହେରା । ଜେଲ ପରିସରରେ ଥିବା ଏକ ଗଛରୁ ଝୁଲନ୍ତା ଅବସ୍ଥାରେ ଦେବପ୍ରକାଶକୁ ଉଦ୍ଧାର କରି କଟକ ବଡ଼ ମେଡିକାଲକୁ ପଠା ଯାଇଥିଲା । ମାତ୍ର ସେଠାରେ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ଜଣାପଡିଛି ।
ସୂଚନାନୁସାରେ, ଦେବପ୍ରକାଶ ଜଣେ ନାବାଳିକାକୁ ଅପହରଣ ଓ ଦୁଷ୍କର୍ମ ଘଟଣାରେ ଚୌଦ୍ବାର ଜେଲରେ ବିଚାରଧୀନ କଏଦୀ ଭାବେ ବନ୍ଦୀ ଜୀବନ କାଟୁଥିଲା । ସୋମବାର ସକାଳୁ ସମସ୍ତ କାର୍ଯ୍ୟ ସାରି ନିଜ ସେଲକୁ ଯାଇଥିଲା । ଏହା ପରେ ସେ ଫୋନ କରିବା ଆଳରେ ସେଲ ବାହାରକୁ ଆସିଥିଲା । ପ୍ରାୟ 1 ଘଣ୍ଟା ବିତିଯିବା ପରେ ସେ ନିଜ ସେଲକୁ ନଫେରିବାରୁ ଜେଲର ଓ୍ବାର୍ଡନ୍ମାନେ ତାକୁ ଖୋଜାଖୋଜି କରିଥିଲେ । ପରେ ଜେଲ ପରିସରରେ ଥିବା ଏକ ଆମ୍ବ ଗଛରେ ତାକୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା । ସେଠାରୁ ତାକୁ ତୁରନ୍ତ ତଳକୁ ଓହ୍ଲାଇ ଏକ ଆମ୍ବୁଲାନ୍ସ ଜରିଆରେ କଟକ ବଡ ଡାକ୍ତରଖାନାକୁ ନିଆଯାଇଥିଲା । ମାତ୍ର ଡାକ୍ତର ସେଠାରେ ଦେବପ୍ରକାଶକୁ ମୃତ ଘୋଷଣା କରିଥିଲେ ।
ତେବେ ବିଗତ ଦିନ ମାନଙ୍କରେ ଚୌଦ୍ବାର ଜେଲର ସୁରକ୍ଷା ବ୍ୟବସ୍ଥାକୁ ନେଇ ଅନେକ ପ୍ରଶ୍ନଵାଚୀ ସୃଷ୍ଟି ହୋଇଛି । ବାରମ୍ବାର କଏଦୀଙ୍କ ମୃତ୍ୟୁକୁ ନେଇ ଚୌଦ୍ବାର ଜେଲ ଚର୍ଚ୍ଚାରେ ଥିବାବେଳେ ଦେବ ପ୍ରକାଶ ମୃତ୍ୟୁ ଆତ୍ମହତ୍ୟା ନା ହତ୍ୟା ତାକୁ ନେଇ ପ୍ରଶ୍ନ ଉଠିଛି । ଉକ୍ତ ଘଟଣାର ଉଚ୍ଚ ସ୍ତରୀୟ ତଦନ୍ତ କରାଗଲେ ପ୍ରକୃତ ସତ୍ୟତା ପଦାକୁ ଆସିବ ବୋଲି ସାଧାରଣରେ ଆଲୋଚନା ହେଉଛି ।
କଟକରୁ ନାରାୟଣ ସାହୁ, ଇଟିଭି ଭାରତ
