କଟକ: କଟକ ବିଜେଡିରେ ଫାଟ ! କଟକ ମେୟର ସୁବାସ ସିଂହଙ୍କୁ ନେଇ ଦଳ ଭିତରେ ଫାଟ ଥିବା ବାରି ହୋଇପଡ଼ୁଛି । ଏକଥା ଆମେ କହୁ ନାହୁଁ ବରଂ କଟକ ମେୟରଙ୍କୁ ନିଜ ଦଳୀୟ କର୍ମୀ ଘେରିବା ଯାହାକି ଦଳ ଭିତରେ ସବୁ କିଛି ଠିକ ଚାଲି ନଥିବା ସ୍ପଷ୍ଟ କରିଛି । କଟକ ନେତାଜୀ ବସ୍ ଟର୍ମିନାଲ ଉଦଘାଟନ ପୂର୍ବରୁ ଦେଖାଦେଇଛି ଏହି ବିବାଦ । ସ୍ଥାନୀୟ ଲୋକଙ୍କୁ ନିଯୁକ୍ତି ଦାବିରେ ନିଜର ଦଳୀୟ କର୍ମୀ ରାସ୍ତାରୋକ କରିବା ସହ ଏକ ରାଜ୍ୟ ବାହାରର ସଂସ୍ଥାକୁ କାହିଁକି ଠିକା ଦିଆଯାଇଛି ବୋଲି ଅଭିଯୋଗ କରିଛନ୍ତି । ରାଜ୍ୟର ସର୍ବବୃହତ ବସ୍ଷ୍ଟାଣ୍ଡ ଉଦଘାଟନ ପୂର୍ବରୁ ବିଧାୟକ ସୌଭିକ ବିଶ୍ୱାଳ ଓ ପୂର୍ବତନ ବିଧାୟକ ଦେବାଶିଷ ସାମନ୍ତରାୟଙ୍କ ସମର୍ଥକ ମାନେ ଏହି ପ୍ରତିବାଦ କରିବାକୁ ନେଇ ଚର୍ଚ୍ଚା ଜୋର ଧରିଛି ।
ବାଦାମବାଡ଼ି ନେତାଜୀ ବସ ଟର୍ମିନାଲ ଉଦଘାଟନ ହେବା ପୂର୍ବରୁ ଆରମ୍ଭ ହୋଇଛି ବିବାଦ। ସ୍ଥାନୀୟ ଲୋକଙ୍କୁ ନିଯୁକ୍ତି ଦାବିରେ ରାସ୍ତାରୋକ ସହ ହୋ ହାଲ୍ଲା ଓ ପାଟିତୁଣ୍ଡ ଦେଖିବାକୁ ମିଳିଛି । ରାଜ୍ୟ ବାହାରର ଠିକା ସଂସ୍ଥାକୁ କାହିଁକି ନିଯୁକ୍ତି ଦାୟିତ୍ୱ ଦିଆଯାଇଛି ବୋଲି ପ୍ରଶ୍ନ କରିବା ସହ ସ୍ଥାନୀୟ ଲୋକଙ୍କୁ ଅଣଦେଖା କରାଯାଉଥିବା ଅଭିଯୋଗ ହୋଇଛି । ତେବେ ସବୁଠାରୁ ବଡ କଥା ହେଉଛି, ଏହି ପ୍ରତିବାଦ ସମୟରେ ଏକାଧିକ ବିଜେଡି ନେତାଙ୍କୁ ଦେଖିବାକୁ ମିଳିଥିଲା । ପୂର୍ବତନ ବିଧାୟକ ଦେବାଶିଷ ସାମନ୍ତରାୟଙ୍କ ସମର୍ଥକଙ୍କ ସହ ବିଜେଡିର କର୍ପୋରେଟର ଓ ବିଭିନ୍ନ ପଦ ପଦବୀରେ ଥିବା ନେତା ଏଥିରେ ସାମିଲ ଥିଲେ । ଗତ ଶୁକ୍ରବାର ଦିନ ମଧ୍ୟ ସୌଭିକ ବିଶ୍ବାଳଙ୍କ ସମର୍ଥକ ଓ ବିଜେଡି ନେତା ମଧ୍ୟ ସମାନ ଦାବି କରି ମେୟର ଓ କମିଶନରଙ୍କୁ ଘେରିଥିଲେ ।
ଏହା ମଧ୍ୟ ପଢ଼ନ୍ତୁ: ତେଜିଲା ନେତାଜୀ ବସ ଟର୍ମିନାଲରେ ନିଯୁକ୍ତି ବିବାଦ, ରାସ୍ତା ରୋକ୍ କଲେ ସ୍ଥାନୀୟ ଯୁବକ