କଟକ: ସହରରେ ଜଣେ ଛାତ୍ରୀଙ୍କୁ ଘରେ ପୁରାଇ ନିଆଁ ଲଗାଇବା ଘଟଣା । ହେଲେ ଏ ଯାଏଁ ବି ଏହି ଜଘନ୍ୟ କାଣ୍ଡର ଟେର ପାଉନାହିଁ ପୋଲିସ । ଘଟଣା ଘଟିବାର ସପ୍ତାହ ବିତିଥିଲେ ବି ଅପରାଧୀଙ୍କୁ ଧରିବାରେ ପୋଲିସ ସକ୍ଷମ ହୋଇ ପାରିନାହିଁ ।
କିଏ ଏବଂ କାହିଁକି ଛାତ୍ରୀ ଜଣଙ୍କୁ ମାରିବାକୁ ଚେଷ୍ଟା କରିଥିଲା ? ଏକତରଫା ପ୍ରେମ ନାଁ ଆଉ କିଛି ? କିପରି ଘରେ ନିଆଁ ଲାଗିଲା ? ଛାତ୍ରୀଙ୍କ ହାତ ବନ୍ଧା ଯାଇଥିଲା କି ? ଯଦି ବନ୍ଧା ଯାଇଥିଲା କେତେ ଜଣ ଏହି ଘଟଣାରେ ସାମିଲ ଥିଲେ ? ଯେଉଁ ଦୂର ସମ୍ପର୍କୀୟଙ୍କ କଥା କୁହାଯାଉଛି କିଏ ଏମାନେ ? କାହିଁକି ଏପରି ଘଟାଇଲେ ? କେଉଁ ପ୍ରକାର ବିବାଦ ଏମାନଙ୍କ ମଧ୍ୟରେ ରହିଥିଲା ? । ଯେଉଁ କିଛି ଦୂର ସମ୍ପର୍କୀୟ ଲୋକଙ୍କୁ ପୋଲିସ ଥାନାରେ ଅଟକ ରଖି ପଚରାଉଚରା କରିଥିଲା କିଛି ତଥ୍ୟ ମିଳିପାରିଲା କି ? ନାଁ ଏହି ଘଟଣାକୁ ଚପାଇବାକୁ ଉଦ୍ୟମ କରାଯାଉଛି ? ଏଭଳି ଅନେକ ପ୍ରଶ୍ନ ଉଠିଛି । ତେବେ ଏନେଇ କଟକ ଡିସିପି କହିଛନ୍ତି ତଦନ୍ତ ପ୍ରକ୍ରିୟା ଜାରି ରହିଛି । ମୋବାଇଲ ବିବରଣୀ ଜାଣିବା ପାଇଁ ଲ୍ୟାବକୁ ପଠାଯାଇଛି । ଏହା ଆସିଲେ ଘଟଣାର ପ୍ରକୃତ କଥା ଜଣାପଡିବ ବୋଲି ସେ ଜଣାଇଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
