କଟକ: କୋରୋନା ବିରୋଧୀ ଯୁଦ୍ଧରେ ପ୍ରକୃତ ସୈନିକ ହେଉଛନ୍ତି ଡାକ୍ତର । ସେମାନଙ୍କ ସୁରକ୍ଷା ପୋଲିସର ବଡ କର୍ତ୍ତବ୍ୟ । ରାଜ୍ୟରେ ଡାକ୍ତର ଓ ଚିକିତ୍ସା ଦିଗରେ ନିୟୋଜିତ ହୋଇଥିବା କର୍ମଚାରୀଙ୍କୁ ସୁରକ୍ଷା ଦେବାକୁ ନିର୍ଦ୍ଦେଶ ଦେଇଛନ୍ତି ପୋଲିସ ମହାନିର୍ଦ୍ଦେଶକ ଅଭୟ ।
ଡାକ୍ତରଙ୍କ ଉପରେ ଯେପରି କୌଣସି ଅପରାଧିକ ସ୍ଥିତି ନଉପୁଜେ ସେଥିପାଇଁ ରାଜ୍ୟର ସମସ୍ତ ଡିସିପି ଓ ଏସପିଙ୍କୁ ନିର୍ଦ୍ଦେଶ ଦେଇଛନ୍ତି ପୋଲିସ ଡିଜି । ସ୍ବାସ୍ଥ୍ୟକର୍ମୀ ଓ ଡାକ୍ତରଙ୍କ ସୁରକ୍ଷା ପ୍ରତି ବେଶ ଧ୍ୟାନ ଦେବାକୁ ପରାମର୍ଶ ଦେଇଛନ୍ତି ଅଭୟ । କାରଣ ବର୍ତ୍ତମାନ ସ୍ଥିତିରେ କୋରୋନା ସଂକ୍ରମଣ ରୋଗୀଙ୍କ ପରିବାରଲୋକେ ଡାକ୍ତରଙ୍କୁ ଦୁର୍ବ୍ୟବହାର କରିବା ମାମଲା ସାମନାକୁ ଆସିଛି । ଯାହା ବେଶ ଦୁର୍ଭାଗ୍ୟଜନକ ବୋଲି ପୋଲିସ ଡିଜି କହିଛନ୍ତି ।
ତେବେ ଯଦି ବି କୌଣସି ଏପରି ମାମଲା ସାମନାକୁ ଆସୁଛି ସଙ୍ଗେ ସଙ୍ଗେ ସେମାନଙ୍କ ବିରୋଧରେ ମାମଲା ରୁଜୁ ହେବ । ଏହାସହ ଦୃଢ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବା ନେଇ ସ୍ପଷ୍ଟ କରିଛନ୍ତି ଡିଜି । ଏହି ଘଟଣାର ତଦନ୍ତକୁ ଜଣେ ଡିଏସପି କିମ୍ବା ବରିଷ୍ଠ ଅଧିକାରୀଙ୍କ ଦ୍ଵାରା ତଦାରଖ କରାଯିବ । ମାସେ ମଧ୍ୟରେ ଚାର୍ଜସିଟ ଓ ଚୂଡାନ୍ତ ଫର୍ମ ଦାଖଲ କରିବେ ଏସପି ଓ ଡିସିପି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
