କଟକ: କଣ୍ଠଶିଳ୍ପୀ ସୌରୀନ ଭଟ୍ଟଙ୍କ ପାଇଁ ବଢିଲା ଅଡୁଆ । ଫସିବେ କଣ୍ଠଶିଳ୍ପୀ ସୌରୀନ ଭଟ୍ଟ। ମହଙ୍ଗା ପଡିପାରେ ପୋଲିସକୁ ତଦନ୍ତରେ ଅସହଯୋଗ କରିବା। ବାରମ୍ବାର ନୋଟିସ ଦେବା ସତ୍ତ୍ୱେ ତଦନ୍ତରେ ସହଯୋଗ କରୁ ନାହାନ୍ତି କଣ୍ଠଶିଳ୍ପୀ ସୌରୀନ । ପୋଲିସ ଖୋଜା ଖୋଜି କରି ବିଫଳ ହେବା ପରେ ପ୍ରଥମେ ଜାରି କରିଥିଲା ଲୁକ୍ଆଉଟ୍ ସର୍କୁଲାର, ପରେ ବ୍ୟାଙ୍କ୍ ଆକାଉଣ୍ଟ୍ ଫ୍ରିଜ୍ ଆଉ ଏବେ ଜାମିନ ବିହୀନ ଗିରଫ ପରଓ୍ବାନା ପାଇଁ କୋର୍ଟଙ୍କ ଦ୍ୱାରସ୍ତ ହୋଇଛି କମିଶନରେଟ୍ ପୋଲିସ । ଫେରାର ଥିବା କଣ୍ଠଶିଳ୍ପୀ ସୌରୀନ୍ ଭଟ୍ଟ ବିରୁଦ୍ଧରେ ଆଇନର ପଞ୍ଝାକୁ ଅଧିକରୁ ଅଧିକ ଶକ୍ତ କରି ଚାଲିଛି ପୋଲିସ । ତେବେ ସୌରୀନଙ୍କ ବିରୁଦ୍ଧରେ କାହିଁକି ଏପରି ଚରମ ନିଷ୍ପତ୍ତି ନେଇଛି କମିଶନରେଟ୍ ପୋଲିସ ସେନେଇ ପ୍ରତିକ୍ରିୟା ଦେଇଛନ୍ତି କଟକ ଅତିରିକ୍ତ ଡିସିପି ଅନୀଲ ମିଶ୍ର ।
କଟକ ଅତିରିକ୍ତ ଡିସିପି କହିଛନ୍ତି ଯେ, ସୌରୀନ ଦୀର୍ଘ ଦିନ ଧରି ଧରା ଛୁଆଁ ନେଦେବାରୁ ଏହି ପଦକ୍ଷେପ ଗ୍ରହଣ କରିଛି ପୋଲିସ । ବହୁବାର ଖୋଜାଖୋଜି କରିବା ପରେ ବି ସୌରୀନର ପତ୍ତା ମିଳୁନାହିଁ । ଏପରିକି ଧରା ଛୁଆଁ ବି ଦେଉ ନାହାଁନ୍ତି ସେ । ତେଣୁ ଆଇନ ଆନୁଯାୟୀ ପଦକ୍ଷେପ ନିଆଯାଉଛି । ଜନୈକ ଯୁବତୀ ସୌରୀନ ବିରୁଦ୍ଧରେ ଯୌନ ଶୋଷଣ ଅଭିଯୋଗ ଆଣି ମହିଳା ଥାନାରେ ଅଭିଯୋଗ କରିଛନ୍ତି । ପୂର୍ଵରୁ ସୌରୀନଙ୍କ ଦୁଇଟି ବ୍ୟାଙ୍କ ଆକାଉଣ୍ଟ ଫ୍ରିଜ୍ କରିଛି ପୋଲିସ । ତାଙ୍କ ବିରୁଦ୍ଧରେ ଲୁକ୍ ଆଉଟ୍ ସର୍କୁଲାର ମଧ୍ୟ ଜାରି ହୋଇଛି ।
ଏହା ମଧ୍ୟ ପଢନ୍ତୁ-ସୌରୀନ ଭଟ୍ଟଙ୍କୁ ମିଳିବନି ଜାମିନ୍ ! NBW ପାଇଁ ଆବେଦନ କଲା କମିଶନରେଟ ପୋଲିସ
ପୂର୍ବରୁ କଲିକତାର ବ୍ୟାଙ୍କ୍ ଅଫ୍ ବରୋଦା ଓ କର୍ପୋରେସନ ବ୍ୟାଙ୍କରେ ଥିବା ସୌରୀନଙ୍କ ଦୁଇଟି ଆକାଉଣ୍ଟକୁ ଫ୍ରିଜ କରିସାରିଛି କମିଶନରେଟ ପୋଲିସ । ଏହା ସହିତ ପୋଲିସ ସୌରୀନଙ୍କ ବିରୁଦ୍ଧରେ ଲୁକ୍ଆଉଟ୍ ସର୍କୁଲାର ଜାରି କରିସାରିଛି । ତେବେ ସୌରୀନଙ୍କୁ ଧରିବା ପାଇଁ କଲିକତା ଯାଇ ପୋଲିସ ଉଦ୍ୟମ କରିଥିଲା । କିନ୍ତୁ ତାଙ୍କ ବାବାଦରେ କୌଣସି ସୂଚନା ନମିଳିବାରୁ ଶେଷରେ ପୋଲିସ ଜାମିନ ବିହୀନ ଗିରଫ ପରଓ୍ବାନା ଜାରି କରିବା ପାଇଁ କୋର୍ଟରେ ଆବେଦନ କରିଥିରଲା ପୋଲିସ । ସୌରୀନଙ୍କ ବିରୁଦ୍ଧରେ କଟକର ଜଣେ ଯୁବତୀ ଦୁଷ୍କର୍ମ ଅଭିଯୋଗ ଆଣି କଟକ ମହିଳା ଥାନାରେ ଏକ ମାମଲା ରୁଜ୍ଜୁ କରିଥିଲେ ।
ମହିଳା ଥାନା ପୋଲିସ ଏହି ମାମଲାରେ ତଦନ୍ତ ଜାରି ରଖିଥିବା ବେଳେ ଅଭିଯୁକ୍ତ ସୌରୀନ ଭଟ୍ଟଙ୍କ ବର୍ତ୍ତମାନ ପର୍ଯ୍ୟନ୍ତ କୌଣସି ପତ୍ତା ମିଳିପାରିନାହିଁ । ପୂର୍ବରୁ ହାଇକୋର୍ଟରୁ ଅନ୍ତରିଣ ସୁରକ୍ଷା ପାଇଁ ସୌରୀନ ଗୋଟିଏ ଥର ହିଁ ଥାନାରେ ହାଜର ହୋଇଥିଲେ । ଏହାପରେ ସେ ପୋଲିସକୁ ଆଉ ଧରା ଛୁଆଁ ନ ଦେବାରୁ ତାଙ୍କ ଦ୍ବିତୀୟ ଜାମିନ ଆବେଦନକୁ କୋର୍ଟ ଖାରଜ କରି ଦେଇଥିଲେ । ପୋଲିସ ପାଖରେ ହଜାର ହେବା ପାଇଁ କୋର୍ଟ ସୌରୀନଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ଏହା ପରେ ତାଙ୍କର କୌଣସି ଅତ୍ତାପତ୍ତା ମିଳୁନାହିଁ । କଟକରେ ରହୁଥିବା ଅଭିଯୋଗକାରୀଙ୍କ ଅଭିଯୋଗ ମୁତାବକ ସୌରୀନ ତାଙ୍କୁ ବିବାହ ପ୍ରତିଶୃତି ଦେଇ ଶାରୀରିକ ଶୋଷଣ କରିବା ସହ ତାଙ୍କଠାରୁ 9 ଲକ୍ଷ ଟଙ୍କା ଠକେଇ କରିଛନ୍ତି ।
ଇଟିଭି ଭାରତ, କଟକ
