କଟକ: ପାଖେଇ ଆସୁଛି ବାରବାଟୀ ମହାଲଢ଼େଇ । ମୁହାଁମୁହିଁ ହେବେ ଭାରତ ଓ ୱେଷ୍ଟଇଣ୍ଡିଜ। ଡିସେମ୍ବର 22ରେ ହେବ ମହା ମୁକାବିଲା। ପ୍ରସ୍ତୁତି କାମ ଚୂଡାନ୍ତ ହୋଇଥିବା ବେଳେ ଅଭ୍ୟାସ ପାଇଁ ପଡ଼ିଆରେ ଲାଗିଲାଣି ନେଟ। ମ୍ୟାଚ ପାଇଁ ପିଚ ଉପରେ ଦିଆଯାଇଛି ବିଶେଷ ଗୁରୁତ୍ବ ।
ମାତ୍ର 5 ଦିନ ମଧ୍ୟରେ ଷ୍ଟାଡିଅମର ସମସ୍ତ କାମ ଶେଷ ହେବା ନେଇ ଲକ୍ଷ ରଖିଛି ଓସିଏ । 20 ଓ 21 ତାରିଖରେ ହେବାକୁ ଥିବା ଅଭ୍ୟାସ ପାଇଁ ମଧ୍ୟ ନେଟ ଲାଗି ସରିଲାଣି । ଷ୍ଟାଡିଅମର ଜରାଜୀର୍ଣ୍ଣ ଅବସ୍ଥାକୁ ସଜାଡ଼ିବା ପାଇଁ 6 ମାସ ଲାଗିବା କଥା କିନ୍ତୁ ତାକୁ କିଛି ଦିନ ମଧ୍ୟରେ ଶେଷ କରିବାକୁ ଲକ୍ଷ୍ୟ ରଖିଛି ଓସିଏ। କାରଣ ଏହା ଓଡିଶା କ୍ରିକେଟ ଆସୋସିଏସନ ପାଇଁ ଚ୍ୟାଲେଞ୍ଜ।
ଅନ୍ୟପଟେ ପିଚ ପ୍ରସ୍ତୁତି କାମ ମଧ୍ୟ ଯୁଦ୍ଧକାଳୀନ ଭିତ୍ତିରେ ଜାରି ରହିଛି । ମୁଖ୍ୟ ପିଚ ଓ ଅଭ୍ୟାସ ପିଚକୁ ବେଶ ସୁନ୍ଦର ଢ଼ଙ୍ଗରେ ନିର୍ମାଣ କରିଛନ୍ତି ଓସିଏ ପିଚ କ୍ୟୁରେଟର । ଏହାସହିତ ଯଦି ପିଚରେ ଥଣ୍ଡା ଯୋଗୁଁ କାକର ବି ପଡେ ତେବେ ମେସିନ ସାହାଯ୍ୟରେ ପିଚ ଓ ଆଉଟ ଫିଲ୍ଡ଼କୁ ମଧ୍ୟ ସଫା କରିହେବ। ଏହାସହିତ ଯେହେତୁ ଫ୍ଲାଟ ପିଚ ରହିଛି ତେବେ ରନ ବର୍ଷା ହେବାର ସମ୍ଭାବନା ରହିଛି ବୋଲି କହିଛନ୍ତି ଓସିଏ ପିଚ କ୍ୟୁରେଟର ପଙ୍କଜ ପଟ୍ଟନାୟକ।
ମହା ଲଢ଼େଇ ପାଇଁ ପ୍ରସ୍ତୁତ ହେଉଛି ବାରବାଟୀ । କାରଣ 22 ତାରିଖରେ ଏହି ଗ୍ରାଉଣ୍ଡରେ ୱେଷ୍ଟ ଇଣ୍ଡିଜ ବିପକ୍ଷରେ ଗର୍ଜିବ ବିରାଟ ବାହିନୀ। ମ୍ୟାଚକୁ ନେଇ ସମସ୍ତଙ୍କ ମଧ୍ୟରେ ଉତ୍ସାହ ରହିଥିବା ବେଳେ ଏବେ ଅପେକ୍ଷା କେବେଳ 22 ତାରିଖକୁ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
