କଟକ: ଜମୁଛି ଐତିହାସିକ ବାଣିଜ୍ୟମେଳା । ଦିନ ବଢିବା ସହ ଜନସମୁଦ୍ର ପାଲୁଟୁଛି ମହାନଦୀ ପଠା । ମେଳା ପଡିଆ ବୁଲା ସାଙ୍ଗକୁ ସୁଆଦିଆ ଖାଦ୍ୟର ମଜା ନେଉଛନ୍ତି ଖାଦ୍ୟ ପ୍ରେମୀ ।
ଦେଶୀ ଚଟପଟା ଖାଦ୍ୟଠୁ ଆରମ୍ଭ କରି ଚାଇନିଜ୍ ଖାଦ୍ୟ ସବୁର ମଜା ନେଉଛନ୍ତି ସଭିଏଁ । ଠୁଙ୍କା ପୁରୀ, ଦହିବରା ଆଲୁଦମ, ଚାଓମିନ, ରୋଲ ଆଦି ପାଲଟିଛି ଦର୍ଶକଙ୍କ ପ୍ରଥମ ପସନ୍ଦ । ସତେ ଯେମିତି ଏସବୁ ନଖାଇଲେ ଲୋକଙ୍କ ବାଲିଯାତ୍ରା ବୁଲା ଅଧାରେ ରହିଯିବ । ଆଉ ଲୋକଙ୍କ ଆଗ୍ରହ ଦେଖି ପରିବା ଦରକୁ ଖାତିର୍ କରୁନାହାଁନ୍ତି ବ୍ୟବସାୟୀ । ଗ୍ରାହକଙ୍କୁ ଭଳିକି ଭଳି ସୁସ୍ବାଦୁ ଖାଦ୍ୟର ମେଳାଇ ଦେଉଛନ୍ତି ପସରା ।
ଚଳିତ ବର୍ଷ ବାଲିଯାତ୍ରା ପଡିଆର ମୁଖ୍ୟ ଆକର୍ଷଣ ହୋଇଛି ଓରମାସ୍ ଷ୍ଟଲରେ ଥିବା ମହାଲକ୍ଷ୍ମୀ ମିଶନ ଶକ୍ତି ଖାଦ୍ୟ ଷ୍ଟଲ । କାକରା ପିଠା, ବୁଢା ଚକୁଳି, ସରୁ ଚକୁଳି, ଛୁଞ୍ଚିପତ୍ର, ଆରିସା ପିଠା, ଗୋଜ ମଣ୍ଡା, ଚାଙ୍ଗୁଡି ମନ୍ଦ, ପୋଡ ପିଠା, ଫୁଲ ମଣ୍ଡା ତୋରଣ ଖିରି ଭଳି 41 ପ୍ରକାରର ଦେଶୀ ଖାଦ୍ୟ ଲୋକଙ୍କୁ ଭେଟି ଦେଉଛି ଏହି ଷ୍ଟଲ । ମହିଳାଙ୍କ ଦ୍ବାରା ପ୍ରସ୍ତୁତ ଏହି ଖାଦ୍ୟ ଓଡିଆ ସଂସ୍କୃତି ଓ ପରମ୍ପରାର ମହକରେ ମହକି ଉଠୁଛି । ସେପଟେ ଏହି ଦେଶୀ ଖାଦ୍ୟ ଖାଇବାକୁ ଦର୍ଶକଙ୍କ ଭିଡ ଜମୁଛି ଏହି ଷ୍ଟଲରେ । ଏହା ସହିତ ପରମ୍ପରାକୁ ମନେ ପକାଇବାର ମହିଳାଙ୍କ ଏହି ପ୍ରୟାସକୁ ସ୍ବାଗତ କରିଛନ୍ତି ଦର୍ଶକ ।
ବର୍ତ୍ତମାନ ସମୟରେ ଲୋକେ ପରମ୍ପରାକୁ ଭୁଲି ଯାଉଥିବା ବେଳେ ବାଲିଯାତ୍ରା ଏହାକୁ ଉଜ୍ଜୀବିତ ରଖିବାରେ ମୁଖ୍ୟ ଭୂମିକା ସାଜିଛି । କେବଳ ରାଜ୍ୟ ନୁହେଁ ରାଜ୍ୟ ବାହାରୁ ଆସୁଥିବା ଦର୍ଶକ ମଧ୍ୟ ଏହି ଦେଶୀ ପରମ୍ପରାକୁ ଉପଭୋଗ କରୁଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
