କଟକ: ନୟାଗଡ଼ ନାବାଳିକା ହତ୍ୟା ମାମଲାରେ ପୁଣି ଏକ ମିସ କେସ ଦାୟର । ଭାରତୀୟ ବିକାଶ ପରିଷଦ ପକ୍ଷରୁ ହାଇକୋର୍ଟରେ ଆଜି(ବୁଧବାର) ପୁଣି ଏକ ମିସ କେସ ଦାୟର କରାଯାଇଛି। ଏତଲାରେ ନାଁ ଥିବା ବ୍ୟକ୍ତିଙ୍କ ପଲିଗ୍ରାଫ ଟେଷ୍ଟ କରିବାକୁ ଆବେଦନ କରାଯାଇଛି ।
ଏସଆଇଟି ପକ୍ଷରୁ ସରୋଜ ସେଠୀ ନାମକ ନାବାଳକ ଛାତ୍ରକୁ ନାବାଳିକାକୁ ହତ୍ୟା କରିବା ପରେ ଦୁଷ୍କର୍ମ କରିବା ସନ୍ଦେହ କରି ଗିରଫ କରିଛି। ଜେରା ବେଳେ ଏସଆଇଟିକୁ ବହୁ ଗୁରୁତ୍ବପୂର୍ଣ୍ଣ ତଥ୍ୟ ପ୍ରମାଣ ମିଳିଥିଲା ।
ମୃତ ନାବାଳିକାର ପୋଷାକରେ ଲାଗିଥିବା ସିମେନ ସରୋଜର ରକ୍ତ ଓ ସିମେନ ସହ ମେଳ ହୋଇପାରି ନଥିବା ଗତ ୧୪ ତାରିଖ ରିପୋର୍ଟରୁ ସ୍ପଷ୍ଟ ହୋଇଛି । ଅନ୍ୟପଟେ ନାବାଳିକାଙ୍କ ମାଆ ଦେଇଥିବା ଏଫଆଇଆରରେ ଯେଉଁ ବ୍ୟକ୍ତିମାନଙ୍କୁ ସନ୍ଦେହ କରି ପୁଲିସ ଓ ଏସଆଇଟିକୁ ଅଭିଯୋଗ କରିଛନ୍ତି ।
ଏହାସହ ସେହି ବ୍ୟକ୍ତିମାନଙ୍କୁ ତଦନ୍ତ ପରିସରଭୁକ୍ତ କରି ସେମାନଙ୍କର ପଲିଗ୍ରାଫ ଟେଷ୍ଟ କରିବା ପାଇଁ ମାନ୍ୟବର ହାଇକୋର୍ଟଙ୍କ ନିକଟରେ ପ୍ରାର୍ଥନା କରିବା ସହିତ ନାବାଳିକାର ପ୍ରକୃତ ହତ୍ୟାକାରୀକୁ ଲୋକଲୋଚନକୁ ଆଣିବା ଓ ପ୍ରକୃତ ଦୋଷୀକୁ ଦଣ୍ଡ ଦେବା ପାଇଁ ପୁର୍ନବାର ସିବିଆଇ ତଦନ୍ତ କରିବା ପାଇଁ ମଧ୍ୟ ପ୍ରାର୍ଥନା କରାଯାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
