କଟକ: ରିଲିଫ ବଣ୍ଟନରେ ମହାଘୋଟଲା ସହ ରିଲିଫ ଟଙ୍କା ଆତ୍ମସାତ ହୋଇଥିବା ବସ୍ତି ବାସିନ୍ଦା ମିଳିତ ମଞ୍ଚ ପକ୍ଷରୁ ଅଭିଯୋଗ ହୋଇଛି । ନିଜ ପରିବାର ପାଇଁ ତଳିଆଞ୍ଚଳବାସୀଙ୍କ ଜୀବନକୁ ବାଜି ଲଗାଇଛନ୍ତି ଜିଲ୍ଲା ପ୍ରଶାସନ ଓ ସିଏମସି । ଯାହାକୁ ନେଇ ସିଲଭରସିଟିରେ ଦେଖାଦେଇଛି ତୀଵ୍ର ଅସନ୍ତୋଷ । ରିଲିଫ ବାହାନାରେ ଲକ୍ଷାଧିକ ଟଙ୍କା ସର୍ବସାନ୍ତ କରିଛନ୍ତି ଉଭୟ ଜିଲ୍ଲା ପ୍ରଶାସନ ଓ ସିଏମସି । ଯାହାର ଖୁବଶୀଘ୍ର ତଦନ୍ତ କରିବା ସହ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାବାକୁ ଦାବି କରିଛନ୍ତି ମଞ୍ଚର ଆବାହକ ଖଗେଶ୍ବର ସେଠୀ ।
ବିଶେଷକରି ପଲିଥିନ ଓ ଶୁଖିଲା ଖାଦ୍ୟ ବଣ୍ଟନ ଦିଗରେ ହୋଇଛି ମହାବିଭ୍ରାଟ । ଲୋକେ ନିଜ ଘର ଘୋଡାଇବା ପାଇଁ ପଲିଥିନର ଅବଶ୍ୟକତା କରୁଥିବାବେଳେ ଯେଉଁ ପଲିଥିନ ଜିଲ୍ଲା ପ୍ରଶାସନ ଯୋଗାଇଦେଇଛି ତାହା ଅତି ନିମ୍ନ ମାନର । ତେବେ ସିଧାସଳଖ କହିବାକୁ ଗଲେ ପ୍ରଶାସନ ପ୍ରହସନର ଶିକାର ହୋଇଛନ୍ତି ସାଧାରଣ ବସ୍ତିବାସିନ୍ଦା । ନିକଟ ଭବିଷ୍ୟତରେ ସଚିବାଳୟ ଘେରାଉ କରିବାର ଚେତାବନୀ ଦେଇଛି ବସ୍ତି ବାସୀନ୍ଦା ମିଳିତ ମଞ୍ଚ।
ଏହାସହିତ ଫନି ଆସିବା ପୂର୍ବରୁ ଯେଉଁ ତଳିଆଞ୍ଚଳ ବାସିନ୍ଦାଙ୍କୁ ଜିଲ୍ଲା ପ୍ରଶାସନ ପକ୍ଷରୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତରିତ କରାଯାଇଥିଲା ସେମାନଙ୍କୁ ଖାଇବା ପିଇବା ଯୋଗାଇବାରେ ମଧ୍ୟ ବିଫଳ ହୋଇଥିଲା ପ୍ରଶାସନ । କିଛି ବେସରକାରୀ ସଂସ୍ଥାର ଖାଦ୍ୟ ଓ ପାନୀୟ ଯୋଗାଣ ଯୋଗୁଁ ଆଶ୍ରୟସ୍ଥଳୀରେ ଏହି ଅମୂଲ୍ୟ ଜୀବନ ବଞ୍ଚିଯାଇଥିବା ଅଭିଯୋଗ କରିଛି ମଞ୍ଚ।
ଅନ୍ୟପଟେ ଏହି ଅଭିଜୋଗକୁ ଖଣ୍ଡନ କରିଛନ୍ତି ସିଏମସି କମିଶନର ଶରତ ଚନ୍ଦ୍ର ନାୟକ । ତାଙ୍କ କହିବାନୂସାରେ ରିଲିଫ ବଣ୍ଟନ କ୍ଷେତ୍ରରେ କୌଣସି ଅନିୟମିତତା ଦୃଷ୍ଟି ଗୋଚର ହୋଇନାହିଁ । ରନ୍ଧାଖାଦ୍ୟ ଠୁ ଆରମ୍ଭ କରି ଶୁଖିଲା ଖାଦ୍ୟ ପର୍ଯ୍ୟନ୍ତ ସମସ୍ତ ଦରକାରୀ ସାମଗ୍ରୀ ବାତ୍ୟା ଆଶ୍ରୟସ୍ଥଳରେ ବଣ୍ଟାଯାଇଛି । ଯାହାକୁ ଲୋକେ ବେଶ ଗ୍ରହଣ କରିଥିବା କମିଶନର କହିଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
