କଟକ: ମାଞ୍ଚେଷ୍ଟାରରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଉଥିବା ସେମିଫାଇନାଲ ମ୍ୟାଚ ବର୍ଷା ଜନିତ ବାଧାପ୍ରାପ୍ତ ହୋଇଛି । ଯାହାଫଳରେ ଆଜି ରିଜର୍ଭ ଡେ ରେ ମ୍ୟାଚ ଖେଳାଯିବ । ତେବେ ଟିମ ଇଣ୍ଡିଆ କିପରି ପ୍ରଦର୍ଶନ କଲେ ମ୍ୟାଚକୁ ସହଜରେ ଜିତି ହେବ, ସେ ନେଇ ‘ଇଟିଭି ଭାରତ’କୁ ସ୍ବତନ୍ତ୍ର ସାକ୍ଷାତକାରରେ ଦେଲେ ପୂର୍ବତନ ରଣଜୀ ଖେଳାଳୀ ପବନ ଅଗ୍ରୱାଲ ।
ସେ କହିଛନ୍ତି ଭାରତୀୟ ଦଳର ପ୍ରଦର୍ଶନ ଭଲ ରହିଛି । ଗତକାଲି ଖେଳା ଯାଇଥିବା ମ୍ଯାଚରେ ବାକିଥିବା ଓଭରକୁ ବୁମେରାଂ, ଭୁବନେଶ୍ବର କୁମାର ସମାପ୍ତ କରିବେ । ଯେହେତୁ ସେମାନଙ୍କ ବୋଲିଂ ତରିକା ଉତ୍ତମ ରହିଛି । ତେଣୁ ଅଧିକ ରନ ନ୍ୟୁଜିଲାଣ୍ଡ କରିବା ଭଳି ଦେଖାଯାଉ ନାହିଁ । ବାକି ଥିବା 3.5 ଓଭରରେ ବିପରୀତ ଦଳ 15/ 16 ରନ୍ କରିପାରନ୍ତି ବୋଲି ଅଗ୍ରୱାଲ କହିଛନ୍ତି ।
ଲିଗ ମ୍ଯାଚରେ ନ୍ୟୁଜିଲାଣ୍ଡ ସହ ଭାରତ ଖେଳିନଥିବାବେଳେ କିନ୍ତୁ ଅଭ୍ୟାସ ମ୍ୟାଚରେ ଟିମର ସ୍ଥିତି ଦୃଢ ରହିଥିଲା । କିନ୍ତୁ ମାନସିକ ସ୍ତରରେ ଯେହେତୁ ଟିମ୍ ଇଣ୍ଡିଆ ଭଲ ରହିଛି, ତେଣୁ ଏହି ମ୍ୟାଚ ଜିତିବା ସୁନିଶ୍ଚିତ । ଯଦି ବିପକ୍ଷ ଦଳ 230 ଭିତରେ ରନ୍ କରେ, ତେବେ ସହଜ ଭାବରେ ଆମ ଟିମ୍ ଦଳ ମ୍ଯାଚକୁ ହାତେଇବାର ସକ୍ଷମ ହେବ ବୋଲି ପୂର୍ବତନ ରଣଜୀ ଖେଳାଳୀ କହିଛନ୍ତି । ସେ ଆହୁରି କହିଛନ୍ତି ଆଜିର ଖେଳ ଜିତିବା ପରେ ନିଶ୍ଚିତ ଭାବରେ ବିଶ୍ବକପ ହାସଲ କରିବାରେ ଭାରତୀୟ ଦଳ ଦାବୀଦାର ରହିବ ।
କଟକରୁ ପ୍ରଭୁକଲ୍ଯାଣ ପାଲ, ଇଟିଭି ଭାରତ
