କଟକ: ଖାନନଗର ଠାରେ ନେତାଜୀ ବସ୍ ଟର୍ମିନାଲ ନିର୍ମାଣ ନେଇ ଦେଖା ଦେଇଛି ବିବାଦ । ନିର୍ମାଣ କାର୍ଯ୍ୟରେ ଅଙ୍କୁଶ ଲଗାଇଲେ ହାଇକୋର୍ଟ । ବସ ଟର୍ମିନାଲ ହେବାକୁ ଥିବା ସ୍ଥାନରେ କାଳୀ ମନ୍ଦିର ରହିଥିବାରୁ ଆଜି(ମଙ୍ଗଳବାର) ଖାନନଗର ଶ୍ମଶାନ କାଳୀଙ୍କ ସମ୍ପତ୍ତି ଉପରେ ସ୍ଥିତାବସ୍ଥା ଜାରି କରିଛନ୍ତି ହାଇକୋର୍ଟ।
କଟକ ଖାନନଗରରେ ବସ ଟର୍ମିନାଲ ପାଇଁ ଚିହ୍ନଟ ହୋଇଥିବା ଜମିରୁ କିଛି ଅଂଶ ମନ୍ଦିର ଜମି ରହିଛି । ଯାହାକୁ ନେଇ ଏହି ଚିହ୍ନଟ ମନ୍ଦିର ଜମି ଉପରେ ସ୍ଥିତାବସ୍ଥା ଜାରି କରିଛନ୍ତି ହାଇକୋର୍ଟ । ମା'ଙ୍କ ସମ୍ପତ୍ତି ସୁରକ୍ଷା କରିବାକୁ ହାଇକୋର୍ଟରେ ଦାୟର ହୋଇଥିଲା ମାମଲା। ପରବର୍ତ୍ତୀ ଶୁଣାଣି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନେଇପାରିବେ ନାହିଁ ସରକାର।
ଏହାସହ ରାଜ୍ୟ ସରକାର, ଆରଡିସି, ଏଣ୍ଡୋମେଣ୍ଟ କମିଶନର, କଟକ ଜିଲ୍ଲାପାଳ, ସିଏମସି କମିଶନର ଓ ସଦର ତହସିଲଦାରଙ୍କୁ ନୋଟିସ ଜାରି କରାଯାଇଛି।
ସୂଚନା ଅନୁସାରେ, କଟକର ଖାନନଗର ଠାରେ ଅତ୍ୟାଧୁନିକ ବସ୍ ଟର୍ମିନାଲ ନିର୍ମାଣ ପାଇଁ ସରକାର ଯୋଜନା ପ୍ରସ୍ତୁତ କରିଛନ୍ତି । ଏଥିପାଇଁ 65 କୋଟି ଖର୍ଚ୍ଚ ହେବ ବୋଲି ଘୋଷଣା ସରିଛି । ମହାନ ସ୍ବାଧୀନତା ସଂଗ୍ରାମୀ ନେତାଜୀ ସୁବାଷ ଚନ୍ଦ୍ର ବୋଷଙ୍କ ନାମରେ ଏହି ଅତ୍ୟାଧୁନିକ ବସ ଟର୍ମିନାଲକୁ ନାମିତ କରାଯିବ ବୋଲି ନିଷ୍ପତି ହୋଇଥିଲା ।
କଟକରୁ ନାରାୟଣ ସାହୁ, ଇଟିଭି ଭାରତ
