କଟକ: ଗଞ୍ଜେଇ ଚୋରାଚାଲାଣର ନୂଆ ଉପାୟ । ଦାମୀ କାର ସହ ମହିଳାଙ୍କୁ ମୋହରା ବନାଉଛି ଗଞ୍ଜେଇ ବେପାରୀ । ଆଶ୍ଚର୍ଯ୍ୟର କଥା ଯେ, ଦାମୀ ଗାଡି ବ୍ୟବହାର ଦ୍ବାରା ବଡବଡୁଆଙ୍କ ଗାଡି ଭାବି ଚେକିଂ କରିବେ ନାହିଁ ପୋଲିସ ବାବୁ । ଫଳରେ ସିଧାସଳଖ ପୋଲିସ ଆଖିରେ ଧୂଳି ଦେଇ ଖସି ଯିବେ ଏହି ଚୋରାଚାଲାଣକାରୀ । କିନ୍ତୁ ଗଞ୍ଜେଇ ଚୋରାଚାଲାଣକାରୀଙ୍କ ଏହି ଉଦ୍ୟମକୁ ପଣ୍ଡ କରିଛି କେନ୍ଦ୍ରୀୟ ଅବକାରୀ ଗୁଇନ୍ଦା ବିଭାଗ ।
ସୂଚନାଯୋଗ୍ୟ, ଗୁରୁବାର ସକାଳେ ମଙ୍ଗୁଳି ଟୋଲ ଗେଟ ନିକଟରେ ପେଟ୍ରୋଲିଂ ବେଳେ ଏକ ବଙ୍ଗୀୟ ଗାଡି (ଟାଟା ମୀନଜା)କୁ ସିଜ କରିଛି ଅବକାରୀ ବିଭାଗ । ଉକ୍ତ ଗାଡିରୁ 1 କ୍ବିଣ୍ଟାଲ 21 କେଜି ଗଞ୍ଜେଇ ସହ କାରବାରରେ ସମ୍ପୃକ୍ତ 2ଜଣଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତ ହେଲେ ଜଣେ ମୁସଲିମ ମହିଳା ରୁକୀୟା ଖାତୁନ ଓ ଖୋକାନ ଭଣ୍ଡାରୀ । ତେବେ ଗାଡିରୁ ଜବତ ଗଞ୍ଜେଇର ଆନୁମାନିକ ମୂଲ୍ୟ 15 ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ । ଗଞ୍ଜେଇ ଭର୍ତ୍ତି ଏହି ଗାଡିଟି ଫୁଲବାଣୀରୁ ହାୱଡା ଯାଉଥିଲା ।
ପ୍ରକାଶ ଯେ, ଗତ ସପ୍ତାହରେ ଜଣେ ବଙ୍ଗୀୟ ଯୁବକଙ୍କ ସହ 1 କ୍ବିଣ୍ଟାଲ 20 କେଜି ଗଞ୍ଜେଇ ଓ ଏକ ଦାମୀ କାର ଜବତ କରିଥିଲା କେନ୍ଦ୍ରୀୟ ଗୁଇନ୍ଦା ବିଭାଗ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
