କଟକ: FIH ପୁରୁଷ ହକି ବିଶ୍ବକପକୁ ନେଇ ବଢୁଛି କ୍ରେଜ୍ । ଆସନ୍ତା ଜାନୁଆରୀ ୧୧ ତାରିଖ ସକାଳ ସମୟରେ କଟକରେ ପହଞ୍ଚିବ ବିଶ୍ବକପ । ସହରର ବିଭିନ୍ନ ସ୍ଥାନରେ ଏହି ଟ୍ରଫିକୁ ସ୍ବାଗତ ସମ୍ବର୍ଦ୍ଧନା ଦିଆଯିବ । ଏହାପରେ ଉଦଘାଟନୀ ଉତ୍ସଵ ଦେଖିବା ପାଇଁ ସହରର ୧୬ ସ୍ଥାନରେ ଫ୍ୟାନ୍ ପାର୍କ ହେବ । 40 ହଜାର ଲୋକ ଷ୍ଟାଡିୟମରେ ଉଦଘାଟନୀ ଉତ୍ସବ ଦେଖିବା ପାଇଁ ସୁଯୋଗ ପାଇବେ । ତେଣୁ ବାକି ଲୋକମାନଙ୍କ ପାଇଁ କଟକର ପ୍ରମୁଖ ସ୍ଥାନମାନଙ୍କରେ ଫ୍ୟାନ୍ ପାର୍କ ବ୍ୟବସ୍ଥା କରାଯିବ । ଯାହାଦ୍ବାରା ସେଠାରେ ଉଦଘାଟନୀ ଉତ୍ସବର ସିଧା ପ୍ରସାରଣ ଦେଖିବା ପାଇଁ ସୁଯୋଗ ପାଇ ପାରିବେ । ଏହାକୁ ନେଇ ସିଏମ୍ସି କମିଶନର ନିଖିଲ ପବନ କଲ୍ୟାଣ ସୂଚନା ଦେଇଛନ୍ତି ।
ଏହାଛଡା କିଛି ବିଦ୍ୟାଳୟରେ ମଧ୍ୟ ହକି ବିଶ୍ବକପ ଉଦଘାଟନୀ ଉତ୍ସବର ସିଧାପ୍ରସାରଣ ପାଇଁ ବ୍ୟବସ୍ଥା କରାଯାଉଛି । ଏହାସହ ଜାନୁଆରୀ ୫ରୁ ୧୦ ତାରିଖ ପର୍ଯ୍ୟନ୍ତ ହକି ବିଶ୍ବକପ ପାଇଁ ସହରରେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହେବ । ସେପଟେ ଵିଶ୍ବକପ ଉଦଘାଟନୀ ସମୟରେ ପରିମଳ ଉପରେ ବିଶେଷ ଧ୍ୟାନ ଦିଆଯିବ। କାମ ତଦାରଖ ପାଇଁ ଏକ ୬ ଜଣିଆ ଟିମ ଗଠନ କରାଯାଇଛି । ଜାନୁଆରୀ ପ୍ରଥମ ସପ୍ତାହ ସୁଦ୍ଧା ସବୁ ଦିଗରେ କାର୍ଯ୍ୟ ଶେଷ ହେବ ଵୋଲି କହିଛନ୍ତି ସିଏମ୍ସି କମିଶନର ।
ଇଟିଭି ଭାରତ, କଟକ
