କଟକ: ଦଶହରା ପ୍ରସିଦ୍ଧ କଟକ । ଏବେ ଠାରୁ ମା'ଙ୍କ ଆବାହନକୁ ନେଇ ଚଳଚଞ୍ଚଳ ହୋଇଉଠିଛି ସହର । କେଉଁଠି ମା'ଙ୍କୁ ଶେଷ ସ୍ପର୍ଶ ଦିଆଯାଉଛି ତ କେଉଁଠି ମେଢ ପ୍ରସ୍ତୁତିରେ ବ୍ୟସ୍ତ କାରିଗର । ସେପଟେ, କିଭଳି ଶାନ୍ତି ଶୃଙ୍ଖଳାରେ ପୂଜା ଅନୁଷ୍ଠିତ ହେବ ସେନେଇ ପ୍ରଶାସନ ମଧ୍ୟ ତୟାର । ତେବେ ଚଳିତ ଦୁର୍ଗା ପୂଜା ଭସାଣିରେ ଭିଡକୁ ନଜରରେ ଅଣ୍ଟା ଭିଡିଛି କଟକ ଶାନ୍ତି କମିଟି । କୌଣସି ଅପ୍ରୀତିକର ପରିସ୍ଥିତି ଏଡାଇବାକୁ ଯତ୍ନବାନ ହୋଇଛି ଶାନ୍ତି କମିଟି ।
କେଉଁ ଆବାହନ କାଳରୁ ପ୍ରସିଦ୍ଧି ଲାଭ କରିଥିବା ଏହି ସହରରେ ମା'ଙ୍କ ଦର୍ଶନ ଲାଗି ପ୍ରବଳ ଭିଡ ଜମେ । ଯାହାକୁ ନେଇ ଚଳିତ ଥର ଶାନ୍ତି କମିଟି ଭିଡ ନିୟନ୍ତ୍ରଣକୁ ନେଇ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଛି । ଏଥର ଭସାଣି 2 ଅନୁପାତ 1 ଭାବରେ କରାଯିବ । ସାହି ଓ ଗଳି ରାସ୍ତାରୁ ମେଢ ବାହାରି ମୁଖ୍ୟ ରାସ୍ତାକୁ 2 ଅନୁପାତ 1ରେ ବାହାରକୁ ଛଡାଯିବ । ଯଦ୍ବାରା ଭିଡ କି ଟ୍ରାଫିକ ଜାମ ହେବ ନାହିଁ ।
ଏହାସହିତ ସବୁ ମେଢ଼କୁ ଶାନ୍ତି ଶୃଙ୍ଖଳା ସହ ବିସର୍ଜନ କରି ହେବ । ତେବେ ଏହି ଯୋଜନା ବାବଦରେ ସମସ୍ତ ପୂଜା କମିଟି ସହ ଆଲୋଚନା ହୋଇଛି ବୋଲି କହିଛନ୍ତି ମହାନଗର ପୂଜା କମିଟି ସମ୍ପାଦକ ପ୍ରଭାତ ତ୍ରିପାଠୀ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
