କଟକ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜିଲ୍ଲାର ନରସିଂହପୁର ଗସ୍ତକରି 931 କୋଟି ଟଙ୍କାର ପ୍ରକଳ୍ପ ଉଦଘାଟନ କରିବା ସହ ଶିଳାନ୍ୟାସ କରିଛନ୍ତି । ଏହି ପ୍ରକଳ୍ପ ମଧ୍ୟରେ ରହିଛି ରାଜ୍ୟର ଅନ୍ୟତମ ବୃହତ ପାନୀୟ ଜଳ ଓ ବିଦୁତ ପ୍ରକଳ୍ପ । ସେପଟେ ପାନୀୟ ଜଳ ଓ ବିଦ୍ୟୁତ ସମସ୍ୟା ଦୂର ହେଉଥିବାରୁ ସ୍ଥାନୀୟ ଲୋକେ ବେଶ ଖୁସି ହୋଇଛନ୍ତି ।
ଏଣିକି ଦୂର ହେବ ନରସିଂହପୁରବାସୀଙ୍କ ଜଳ କଷ୍ଟ । ସ୍ଥାନୀୟ ଅଞ୍ଚଳର ପାଣି ସମସ୍ୟା ଦୂର କରିବା ପାଇଁ ଘୋରାଢ଼ିଆ ଠାରେ ମୁଖ୍ୟମନ୍ତ୍ରୀ ଶିଳାନ୍ୟାସ କରିଛନ୍ତି ୨୩୭ କୋଟି ଟଙ୍କାର ମେଗା ପାନୀୟ ଜଳ ଯୋଗାଣ ପ୍ରକଳ୍ପ। ଏହା ଦ୍ୱାରା ବଡମ୍ବା ବ୍ଲକର ୩୮ଟି ପଞ୍ଚାୟତ ଓ ନରସିଂହପୁର ବ୍ଲକର ୩୫ଟି ପଞ୍ଚାୟତର ମୋଟ ତିନି ଲକ୍ଷ ଲୋକେ ଦୈନିକ 70 ଲିଟର ଶୁଦ୍ଧ ପାନୀୟ ଜଳ ପାଇପାରିବେ।
ଏଥିସହିତ ମୁଖ୍ୟମନ୍ତ୍ରୀ ପ୍ରାୟ ୪ଶହ କୋଟି ଟଙ୍କା ବ୍ୟୟରେ ଚାଷ ଜମିକୁ ଜଳ ସେଚନ ପ୍ରକଳ୍ପର ଉଦଘାଟନ ମଧ୍ୟ କରିଛନ୍ତି। ଏହାସହ ୪୩ କୋଟି ୪୬ ଲକ୍ଷ ଟଙ୍କା ବ୍ୟୟରେ ନରସିଂହପୁରରେ ନିର୍ମାଣ ହୋଇଥିବା ବିଦ୍ୟୁତ ଗ୍ରୀଡ଼ର ଶୁଭାରମ୍ଭ ମଧ୍ୟ କରିଛନ୍ତି।
ଏହି ପ୍ରକଳ୍ପ ଗୁଡିକରେ ଜଳ ସେଚନ ଓ ପିଇବା ପାଣି ଉପରେ ଅଧିକ ଗୁରୁତ୍ୱ ଦିଆଯାଇଛି ବୋଲି କହିଛନ୍ତି ମୁଖ୍ୟମନ୍ତ୍ରୀ । ଏହା ସହ କାଳିଆ ଯୋଜନାର ସୁଫଳ କଥା ମଧ୍ୟ କହିଛନ୍ତି । ସେପଟେ ଏହା ନରସିଂହପୁର ବାସୀଙ୍କ ପାଇଁ ଏକ ବରଦାନ ବୋଲି କହିଛନ୍ତି ସ୍ଥାନୀୟ ବିଧାୟକ ଦେବୀ ମିଶ୍ର । କେବଳ ଏତିକି ନୁହେଁ ନରସିଂହପୁର ବ୍ଲକର ମର୍ଦ୍ଧମେଖ ବଡମ୍ବା ବ୍ଲକର ଗୋପପୁର ଓ ଧୋବଣୀନାଳ ନିକଟରେ ୩୦ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ସବ ଗ୍ରୀଡ଼ର ଶୁଭାରମ୍ଭ କରିବା ସହ ବଡମ୍ବା ବ୍ଲକରେ ୧୮୫ କୋଟି ଟଙ୍କା ବ୍ୟୟରେ ରେଙ୍ଗାଲି ଦକ୍ଷିଣ କେନାଲର ଉଦଘାଟନ କରିଛନ୍ତି।
କଟକରୁ ନାରାୟଣ ସାହୁ, ଇଟିଭି ଭାରତ
