ନିଆଳି: କଳାହାଣ୍ଡି ଶିକ୍ଷୟତ୍ରୀ ମମିତା ମେହେର ମୃତ୍ୟୁ ମାମଲା । ଘଟଣାରେ ସିବିଆଇ ତଦନ୍ତ ଦାବି କରି କଟକ ଜିଲ୍ଲାର ନିଆଳି ଥାନା ଘେରାଉ କରିବା ସହିତ ବିକ୍ଷୋଭ ପ୍ରଦର୍ଶନ କରିଛି ବିଜେପି । ଏହାସହିତ ମମିତାଙ୍କ ପରିବାରକୁ ନ୍ୟାୟ ଦେବା ପାଇଁ ମଧ୍ୟ ଦାବି ହୋଇଛି ।
ଦିନକୁ ଦିନ ମମିତା ମୃତ୍ୟୁ ଘଟଣାକୁ ରାଜନୀତି ସରଗରମ ହେବାରେ ଲାଗିଛି । ବିଜେପି ଓ କଂଗ୍ରେସ ଦଳର ଟାର୍ଗେଟରେ ବିଜେଡି ଦଳର ଟାଣୁଆ ନେତା ମନ୍ତ୍ରୀ ଦିବ୍ୟଶଙ୍କର ମିଶ୍ର । ହତ୍ୟାକାଣ୍ତରେ ମନ୍ତ୍ରୀଙ୍କ ସମ୍ପୃକ୍ତି ନେଇ ଦୁଇ ଦଳ ଏବେ ରାଜ୍ୟ ବିଜେଡ଼ି ଦଳକୁ ଲହୁ ଲୁହାଣ କରି ସାରିଲେଣି । ବିଜେପି ସବୁ ପ୍ରସଙ୍ଗକୁ ଦୂରେଇ ରହି ମମିତାଙ୍କୁ ନ୍ୟାୟ ଦେବା ଓ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ଗିରଫ କରିବା ଦାବିରେ କଟକ ଜିଲ୍ଲା ଭାରତୀୟ ଜନତା ପାର୍ଟି ତରଫରୁ ଥାନା ଘେରାଉ କରାଯିବା ସହ ବିରୋଧ ପ୍ରଦର୍ଶନ କରାଯାଇଛି ।
ଘଟଣାର ଓଡ଼ିଶା ପୋଲିସ ତଦନ୍ତ ନୁହେଁ ବରଂ CBI ଦ୍ବାରା ତଦନ୍ତ କରାଗଲେ ପ୍ରକୃତ ଦୋଷୀ ଧରା ପଡିବା ସହ ଦଣ୍ତ ମିଳିପାରିବ ଏବଂ ମମିତାଙ୍କ ପରିବାରଙ୍କୁ ଉଚିତ ନ୍ୟାୟ ମିଳିପାରିବ ବୋଲି ବିଜେପି ଦୃଢୋକ୍ତି ପ୍ରକାଶ କରିଛି । ମମିତା ମୃତ୍ୟୁକୁ ନେଇ ଓଡ଼ିଶା ସାରା ନିଆଁ ଜଳୁଛି । ଥାନା, ତହସିଲ,ବ୍ଲକ, ଜିଲ୍ଲାପାଳ ଅଫିସ ଓ ରାଜ ରାସ୍ତାରେ ବିଜେପି ଓ କଂଗ୍ରେସ ପକ୍ଷରୁ ଦୃଢ଼ ବିରୋଧ ଜାରି ରହିଛି ।
ମନ୍ତ୍ରୀଙ୍କ ସମ୍ପୃକ୍ତି ନେଇ ରାଜନୀତି ଜୋର ଧରିଛି । ତେବେ ନିଆଳି ଥାନା ଘେରାଉ ସମୟରେ ସ୍ଥାନୀୟ ବିଜେପି ନେତା ଛବି ମଲ୍ଲିକ, ରାଜ୍ୟ ବିଜେପି ପ୍ରବକ୍ତା ରାଜେନ୍ଦ୍ର ପଣ୍ଡା, ରାଜ୍ୟ ସଂଖ୍ୟା ଲଘୁ ନେତା ସେକ ହସନ, ମଣ୍ତଳ ଉପସଭାପତି ତ୍ରିଲୋଚନ ବେହେରା, ସନ୍ତୋଷ ବିଶ୍ବାଳ, ମଧୁସ୍ମିତା ମଲ୍ଲିକ ଓ ପ୍ରଶାନ୍ତ ପ୍ରଧାନ ପ୍ରମୁଖ ଉପସ୍ଥିତ ଥିଲେ ।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
