କଟକ: ବିଜେପି ମୁହାଁ ହେଉଛନ୍ତି କି ବିଜେଡି ନେତା ତଥା ଅଭିନେତା ଅରିନ୍ଦମ ରାୟ ! ଗତ କିଛି ଦିନ ପୂର୍ବେ ଅରିନ୍ଦମ ରେଳମନ୍ତ୍ରୀଙ୍କୁ ଭେଟିବା, ଆଉ ଏବେ କଟକ ଜିଲ୍ଲା ବିଜେପି ସଭାପତିଙ୍କୁ ଭେଟିବାକୁ ନେଇ ଚର୍ଚ୍ଚା ବଢ଼ିବାରେ ଲାଗିଛି । ଯଦିଓ ଏନେଇ ଅରିନ୍ଦମଙ୍କ ପକ୍ଷରୁ କୌଣସି ସ୍ପଷ୍ଟ ପ୍ରତିକ୍ରିୟା ମିଳିପାରି ନାହିଁ, ତଥାପି ଏହି ଫଟୋ ଗତ ରବିବାରର ବୋଲି କୁହାଯାଉଛି । କଟକ ବିଜେପି ଜିଲ୍ଲା ସଭାପତିଙ୍କ ସହ ଅରିନ୍ଦମଙ୍କ ଏକ ଫଟୋ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ସାଲେପୁର ବାସଭବନରେ ଉଭୟଙ୍କ ମଧ୍ୟରେ ଆଲୋଚନା ସମୟର ଏହି ଫଟୋ ବୋଲି ଚର୍ଚ୍ଚା ହେଉଛି ।
ତେବେ ଅରିନ୍ଦମ ଗୋଟିଏ ପରେ ଗୋଟିଏ ବିଜେପି ନେତାଙ୍କ ସହ ଭେଟଘାଟ କଟକ ରାଜନୀତିକୁ ସରଗରମ କରିଛି । କିଛି ଦିନ ପୂର୍ବରୁ କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବଙ୍କୁ ଦେଖା କରିବା ପରେ ଜିଲ୍ଲା ସଭାପତିଙ୍କ ସହ ତାଙ୍କର ଏହି ଫଟୋକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଅରିନ୍ଦମ ବିଜେପି ଆଡକୁ ଢଳୁଛନ୍ତି କି ? ସେ ବିଜେପିରେ ଯୋଗ ଦେଇପାରନ୍ତି କି ବୋଲି ନାନା ଆଲୋଚନା ଆରମ୍ଭ ହୋଇଛି । ତେବେ ସେ ଦୀର୍ଘ ଦିନ ଧରି ବିଜେଡିରୁ କୋଣଠୋସା ହୋଇ ରହିଥିବାବେଳ ଅସନ୍ତୋଷ ମଧ୍ୟ ପ୍ରକାଶ କରିଥିଲେ । ଏହାସହ ମୁଁ କାହା ସହ ଦେଖା କରିବାରେ କିଛି ଅସୁବିଧା ନାହିଁ ଯିଏ ଯାହା ଭାବୁଛନ୍ତି ଭାବନ୍ତୁ ବୋଲି ମଧ୍ୟ କହିଥିଲେ ଅରିନ୍ଦମ ।
ଏହାବି ପଢନ୍ତୁ...ବିଜେଡି ଛାଡିବେ ଅରିନ୍ଦମ ରାୟ ! ଅଶ୍ବିନୀ ବୈଷ୍ଣବଙ୍କୁ ଭେଟିବା ପରେ ବଢ଼ିଲା ଚର୍ଚ୍ଚା
ବିଜେଡି ଛାଡିପାରନ୍ତି ଅଭିନେତା ଅରିନ୍ଦମ ରାୟ ! ଶଙ୍ଖ ଛାଡି ପଦ୍ମ ଧରି ପାରନ୍ତି ଅରିନ୍ଦମ ! କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଭେଟିବା ପରେ ଏହି ପ୍ରସଙ୍ଗ ଏବେ ବେଶ ଚର୍ଚ୍ଚାର ବିଷୟ ପାଲଟିଛି । ବିଜେଡି ସାଂଗଠନିକ ସମ୍ପାଦକ ବବି ଦାସଙ୍କ ଶଳା ଅରିନ୍ଦମ ରାୟ, ବିଜେଡି ଛାଡିବାକୁ ନେଇ କଟକ ରାଜନୀତିରେ ହଟଚମଟ ସୃଷ୍ଟି ହୋଇଛି । ଯଦି ଏପରି ହୁଏ ତେବେ ରାଜ୍ୟ ରାଜନୀତିରେ ବି ହଟଚମଟ ହେବାର ସମ୍ଭାବନାକୁ ଏଡାଇ ଦିଆଯାଇନପାରେ । ଅଶ୍ୱିନୀ ବୈଷ୍ଣବଙ୍କ ସହ ଅରିନ୍ଦମଙ୍କ ଏକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା ।
୨୦୦୯ରେ ଅରିନ୍ଦମ ବିଜେଡିର ଷ୍ଟାର ପ୍ରଚାରକ ଭାବେ କାର୍ଯ୍ୟ କରିଥିଲେ । ୨୦୨୨ରେ ସେ ଦଳର ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ପାଇଥିଲେ । ଦଳର ସାଧାରଣ ସମ୍ପାଦକ ଭାବେ ସେ ଦାୟିତ୍ୱ ନେଇଥିଲେ । ପରବର୍ତ୍ତୀ ସମୟରେ ସେ ଦଳର ଅନେକ ପ୍ରାର୍ଥୀଙ୍କ ପାଇଁ କ୍ୟାମ୍ପେନିଂ କରିଛନ୍ତି । ଦଳର ସଙ୍ଗଠନ ମଜଭୁତ କରିବା ପାଇଁ ତାଙ୍କର ଭୂମିକା ମଧ୍ୟ ରହିଛି । କେବଳ ସେତିକି ନୁହେଁ, ବିଭିନ୍ନ ସ୍ଥାନରେ ପ୍ରାର୍ଥୀ ପାଇଁ ତାଙ୍କର ନାମକୁ ନେଇ ମଧ୍ୟ ବେଶ ଚର୍ଚ୍ଚା ହୋଇଥିଲା । ବିଶେଷକରି ଲୋକସଭା ଓ ରାଜ୍ୟସଭା ସାଂସଦ ପାଇଁ ତାଙ୍କର ନାମକୁ ନେଇ ଚର୍ଚ୍ଚା ବି ହୋଇଥିଲା । ସେହିପରି ସିଏମସି ନିର୍ବାଚନ ସମୟରେ ସେ ମେୟର ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହୋଇଥିଲା । ମାତ୍ର ଦଳ ତାଙ୍କୁ କୌଣସି ସ୍ଥାନରେ ମେୟର କରିନାହିଁ । ଯାହାକୁ ନେଇ ଅରିନ୍ଦମ ଅସନ୍ତୁଷ୍ଟ ଥାଇପାରନ୍ତି ବୋଲି ଆକଳନ କରିଛନ୍ତି ରାଜନୀତି ସମୀକ୍ଷକ ।
ସେହିପରି କିଛି ମାସ ପୂର୍ବରୁ ଗଣମାଧ୍ୟମ ସାମ୍ନାରେ ଅରିନ୍ଦମ ମଧ୍ୟ ନିଜର ଅସନ୍ତୋଷ ଜାହିର କରିଥିଲେ । ଦଳ ଯଦି ତାଙ୍କୁ ଆବଶ୍ୟକ କରୁନାହିଁ, ତେବେ ସେ ଦଳରେ କାହିଁକି ରହିବେ ବୋଲି କହିଥିଲେ । ସେତେବେଳେ ସ୍ପଷ୍ଟ ବାରି ହୋଇପଡୁଥିଲା କି ଅରିନ୍ଦମ ବିଜେଡି ଛାଡି ପାରନ୍ତି । ତେବେ ରବିବାର ଦିନ ଅରିନ୍ଦମ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଭେଟିବା ସହ ପ୍ରାୟ ଅଧଘଣ୍ଟା ରୁଦ୍ଧଦ୍ୱାର ବୈଠକ କରିଥିଲେ । ଏହି ବୈଠକରେ କ'ଣ କ'ଣ ଆଲୋଚନା ହୋଇଥିଲା, ଯଦିଓ ସେନେଇ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ କିମ୍ବା ଏନେଇ ଅରିନ୍ଦମ ଯଦିଓ କୌଣସି ପ୍ରତିକ୍ରିୟା ଦେଇନାହାନ୍ତି ତଥାପି ଏହାକୁ ନେଇ ରାଜନୀତି ଉଷ୍ମତା ବଢିଯାଇଛି । ଆଲୋଚନା ହେଉଛି କି ଅରିନ୍ଦମ ବିଜେଡି ଛାଡି ବିଜେପିରେ ଯୋଗ ଦେଇପାରନ୍ତି ।
ଇଟିଭି ଭାରତ, କଟକ
