କଟକ: ଡାକ୍ତରୀ ପାଠ ପଢିବି , ଦୁଃଖୀରଙ୍କିଙ୍କ ସେବା କରିବି । ଏ ବାକ୍ୟକୁ ସତ୍ୟ ପ୍ରମାଣିତ କରିବାକୁ ମନ ବଳାଇଛନ୍ତି ପୁଷ୍ପାଞ୍ଜଳୀ । ପୁରୀ ଜିଲ୍ଲା ଗୋପ ବ୍ଲକ ଦେସ୍ଥଳି ପଞ୍ଚାୟତ ଆମପଡା ଗାଁର ଅଟୋ ଚାଳକ ପବିତ୍ର ମୋହନ ସାହୁଙ୍କ ଝିଅ ପୁଷ୍ପାଞ୍ଜଳୀ । ସର୍ବଭାରତୀୟ ସ୍ତରରେ ମେଡିକାଲ ପ୍ରବେଶିକା ପରୀକ୍ଷା (NEET) ରେ ସଫଳତା ଅର୍ଜନ କରିଛନ୍ତି ସେ । ଚଳିତବର୍ଷ ନିଟ୍ ପରୀକ୍ଷା ଦେଇଥିଲେ ୧୫ ଲକ୍ଷ ଛାତ୍ରଛାତ୍ରୀ । ସେମାନଙ୍କ ମଧ୍ୟରୁ ପୁଷ୍ପାଞ୍ଜଳୀ ନିଟ୍ ପରୀକ୍ଷାରେ ୯୪୭୮ ରାଙ୍କ ପାଇବାରେ ସକ୍ଷମ ହୋଇଛନ୍ତି।
ଅଭାବ ଅନଟନରେ ପରିବାର ଚାଲୁଥିଲେ ମଧ୍ୟ ଝିଅର ପାଠ ପଢା ବୋଝ ମୁଣ୍ତରେ ମୁଣ୍ଡାଇଛନ୍ତି ପବିତ୍ର । ଆର୍ଥିକ ସ୍ଥିତି ଦୁର୍ବଳ ଥିବାରୁ ମେଡିକାଲ ପାଠ ଝିଅକୁ କିପରି ପଢାଇବେ ବୋଲି ସେ ଚିନ୍ତାରେ ପଡିଛନ୍ତି । ଯେଉଁଠି ଦି ଓଳି ଦି ମୁଠା ଖାଇବା କଷ୍ଟକର ସେଠି ମେଡିକାଲ ପାଠ ପଢା ପାଇଁ ଲକ୍ଷାଧିକ ଟଙ୍କା ଆଣିବେ କେଉଁଠୁ ବୋଲି ସେ ଭାଳି ହେଉଛନ୍ତି । ନୟାହାଟରେ ଏକ ଘରଭଡାରେ ପରିବାରଙ୍କୁ ନେଇ ରୁହନ୍ତି ପବିତ୍ର ।
ପୁଷ୍ପାଞ୍ଜଳୀ ବିଜେବି କଲେଜରୁ ଯୁକ୍ତ ବିଜ୍ଞାନରେ ୯୪ ପ୍ରତିଶତ ମାର୍କ ରଖି ପାସ କରିଛନ୍ତି । ଅଭାବ ଅନଟନରେ ଚଳୁଥିଲେ ସୁଦ୍ଧା ପୁଷ୍ପାଞ୍ଜଳୀଙ୍କ ପାଠପଢା କ୍ଷେତ୍ରରେ ଏଯାଏଁ କୈଣସି ପ୍ରଭାବ ପଡି ନାହିଁ । ଦୃଢ ଇଚ୍ଛାଶକ୍ତି ଓ କଠିନ ପରିଶ୍ରମ ଯୋଗୁଁ ଆଜି ଏ ସଫଳତା ତାଙ୍କୁ ମିଳିଛି ।
