କଟକ: ସରିଛି ତୃତୀୟ ପର୍ଯ୍ୟାୟ ମତଦାନ । ଏବେ ଷ୍ଟ୍ରଙ୍ଗରୁମରେ ଇଭିଏମ ମେସିନ । ପ୍ରମୁଖ ରାଜନୈତିକ ଦଳର ଏଜେଣ୍ଟ ବା ପ୍ରାର୍ଥୀ ଓ ଜିଲାପାଳଙ୍କ ଉପସ୍ଥିତିରେ ସମସ୍ତ ଇଭିଏମ ମେସିନକୁ ସିଲ କରିଛି ଜିଲା ପ୍ରଶାସନ । ଏହାସହିତ ଭୋଟ ଗଣତି ପର୍ଯ୍ୟନ୍ତ ଏହି ଷ୍ଟ୍ରଙ୍ଗ ରୁମରେ 24 ଘଣ୍ଟିଆ ସିସିଟିଭି ଓ କେନ୍ଦ୍ରୀୟ ପାରା ମିଲିଟାରୀ ଫୋର୍ସ ଓ ରାଜ୍ୟ ପୋଲିସ ବିଭାଗ କଡା ନଜର ରଖିବ ବୋଲି କହିଛନ୍ତି ଜିଲାପାଳ ଅରବିନ୍ଦ ଅଗ୍ରୱାଲ ।
ଫୋଲଡିଂ ଇଭିଏମକୁ ଯଥାକ୍ରମେ ପୋଲିଂ ଓ ପ୍ରିଜାଇଡିଂ ଅଫିସରମାନେ ସିଲ କରିବା ପରେ ମଧ୍ୟ ପ୍ରଶାସନ ପକ୍ଷରୁ ପୁଣି ଥରେ ଏହି ପ୍ରକ୍ରିୟା କରାଯାଇଥାଏ । ଯେପରି ଭୋଟ ଗଣତି ସମୟରେ କୌଣସି ତ୍ରୁଟି ନ ଉପୁଜିବ । ସେଥିପାଇଁ ପ୍ରମୁଖ ଦଳ ମାନଙ୍କର ଏଜେଣ୍ଟ, ପ୍ରାର୍ଥୀ ଓ ଜିଲାପାଳଙ୍କ ଉପସ୍ଥିତିରେ ସମସ୍ତ ଇଭିଏମକୁ ସିଲ କରାଯାଇଛି ।
3ୟ ପର୍ଯ୍ୟୟରେ ହୋଇଥିବା ନିର୍ବଚନରେ କଟକର 6ଟି ନିର୍ବାଚନ ମଣ୍ଡଳୀ ସାମିଲ ରହିଥିଲା । ଯେଉଁଥିରୁ ବୋଷ କଲେଜରେ ବାରବଟୀ, ସଦର ଓ ଚୌଦ୍ୱାର ନିର୍ବଚନ ମଣ୍ଡଳୀର ଇଭିଏମ ରହିଥିଲା ବେଳେ ଆଠଗଡ଼, ବଡମ୍ବା ନର୍ସିଂପୁରର ଗୋପବନ୍ଧୁ ବିଜ୍ଞାନ କଲେଜ ଓ ବାଙ୍କୀ ନିର୍ବାଚନ ମଣ୍ଡଳୀର ବାଙ୍କୀ ସ୍ୱୟଂଶାସିତ କଲେଜର ଷ୍ଟ୍ରଙ୍ଗରୁମରେ ରଖାଯାଇଛି ।
ସୁଚନା ମୁତାବକ, ଗତକାଲି କଟକର ବିଭିନ୍ନ ବୁଥରେ ଇଭିଏମ ଅଚଳ ହେବାରୁ ବିଳମ୍ବରେ ମତଦାନ ଶେଷ ହୋଇଥିଲା । ଯାହାଫଳରେ କଟକରେ 69.65 ପ୍ରତିଶତ ମତଦାନ ହୋଇପାରିଥିଲା ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
