କଟକ: ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଦୁଷ୍କର୍ମ ମାମଲା। ନିକଟରେ କଟକରେ ନାବାଳିକାକୁ ଅପହରଣ କରି 22 ଦିନ ଧରି ଦୁଷ୍କର୍ମ କରିବା ଘଟଣା ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି । ରାଜ୍ୟରେ ବଢୁଥିବା ନାରୀ ନିର୍ଯାତନା ଓ ଦୁଷ୍କର୍ମ ଘଟଣାକୁ ନିନ୍ଦା କରି କଟକ ଡିସିପି କାର୍ଯ୍ୟାଳୟ ସମ୍ମୁଖରେ ଗୁରୁବାର ବିକ୍ଷୋଭ ପ୍ରଦର୍ଶନ କରିଛି ଏଆଇଡିଏସଓ ।
କଟକରେ ନାବାଳିକା ଦୁଷ୍କର୍ମ ଘଟଣାରେ ପୀଡ଼ିତାଙ୍କୁ କିଭଳି ନ୍ୟାୟ ମିଳିବ ଏବଂ ସହର ଭିତରେ କିପରି ନାରୀମାନେ ସୁରକ୍ଷିତ ଭାବେ ଚଳପ୍ରଚଳ କରିବେ ସେନେଇ ଏଆଇଡିଏସଓ ଦ୍ବାରା କଟକ ଡିସିପିଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି । ଦେଶରେ ପ୍ରତିଦିନ ଗଣଦୁଷ୍କର୍ମ ଭଳି ଅଭାବନୀୟ ଘଟଣା ଘଟି ଚାଲିଛି । ଏଥିପାଇଁ ମୁଖ୍ୟତଃ ମଦ ଓ ଅଶ୍ଲୀଳ ଚଳଚ୍ଚିତ୍ର ଦାୟୀ । ଏହାଦ୍ବାରା ମାନସିକ ସ୍ଥିତି ଖରାପ ହେବା ଫଳରେ ଅସାମାଜିକ ବ୍ୟକ୍ତିମାନେ ଏଭଳି ନାରକୀୟ କାଣ୍ଡ ଭିଆଉଛନ୍ତି । ତେଣୁ ଏହାର ମୂଳ ପୋଛ ହେବା ଦରକାର ବୋଲି ଦାବି କରିଛନ୍ତି ଆନ୍ଦୋଳନକାରୀ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
