କଟକ: ଆଠଗଡ ଗୁରୁଡିଝାଟିଆ ସ୍ବାସ୍ଥ୍ୟକେନ୍ଦ୍ରରେ ପ୍ରସବ ଘଟଣାର ତଦନ୍ତ ନିର୍ଦ୍ଦେଶ ଦେଲେ କଟକ ସିଡିଏମଓ । ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପରିସରରେ ଘଟିଥିବା ଅଭାବନୀୟ ଘଟଣା ପରେ ପଦାରେ ପଡିଛି ସ୍ବାସ୍ଥ୍ୟ ବିଭାଗର ନଗ୍ନଚିତ୍ର । ଗୋଟିଏ ପଟେ ସରକାର ନିଜକୁ ମହିଳା ସରକାର କହୁଥିବାବେଳେ ଅନ୍ୟପଟେ ଏଭଳି ଦୃଶ୍ୟ ସ୍ବାସ୍ଥ୍ୟ ସେବାର ବାସ୍ତବତାକୁ ଦର୍ଶାଉଛି । ଆସନ୍ନ ପ୍ରସବ ମହିଳାଙ୍କ ପାଇଁ ବନ୍ଦ ଥିଲା ସରକାରୀ ହସ୍ପିଟାଲ । ଏଥିଯୋଗୁଁ ହସ୍ପିଟାଲ ବାହାରେ ପ୍ରସବ କଲେ ପ୍ରସୂତି ।
ସୂଚନାନୁସାରେ, ଖମାର ନୂଆଗାଁର କୁନି ମହାରଣା ପ୍ରସବ ପାଇଁ ଗୁରୁଡିଝାଟିଆ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଯାଇଥିଲେ । ହେଲେ ସ୍ବାସ୍ଥ୍ୟକେନ୍ଦ୍ର ବନ୍ଦ ଥିବାରୁ କୁନି ହସ୍ପିଟାଲରେ ବାହାରେ ଏକ ଶିଶୁକନ୍ୟାକୁ ଜନ୍ମ ଦେଇଥିଲେ । ତେବେ ହସ୍ପିଟାଲ ବାହାରେ ପ୍ରସୂତି ଜଣକ ଶିଶୁକନ୍ୟାକୁ ଅତି ବିପଦଜନ୍ନକ ଭାବେ ହାତରେ ଧରି ଆମ୍ବୁଲାନ୍ସ ପର୍ଯ୍ୟନ୍ତ ପହଞ୍ଚିବା ଚିତ୍ର ଦେଖି ଯେକୌଣସି ବ୍ୟକ୍ତିଙ୍କ ଛାତି ଥରି ଉଠିବ । ମାତ୍ର ଜନ୍ମ ପରେ ଶିଶୁକନ୍ୟାର ଘଟଣାସ୍ଥଳରେ ମୃତ୍ୟୁ ହୋଇଥିଲା ।
ଏଭଳି ଘଟଣା ସାମନାକୁ ଆସିବା ପରେ କାହା ପାଇଁ ଜନନୀ ସୁରକ୍ଷା ଯୋଜନା ତାହାକୁ ନେଇ ସାଧାରଣରେ ଚର୍ଚ୍ଚା ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
