କଟକ: ଓଡିଶା ପୋଲିସର ୬୩ତମ ବରିଷ୍ଠ ପୋଲିସ ଅଧିକାରୀ ସମ୍ମିଳନୀ ଉଦଘାଟିତ ହୋଇଯାଇଛି । ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଅଭୟ ରାଜ୍ୟ ପୋଲିସ ମୁଖ୍ୟ କାର୍ଯ୍ୟାଳୟ ଠାରେ ଆନୁଷ୍ଠାନିକ ଭାବେ ସମ୍ମିଳନୀ ଉଦଘାଟନ କରିଛନ୍ତି । 3 ଦିନ ଧରି ଭର୍ଚ୍ଚୁଆଲ ପ୍ଲାଟଫର୍ମରେ ଏହି ସମ୍ମିଳନୀ ହେବ ବୋଲି ଜଣାପଡ଼ିଛି ।
ଏହି ସମ୍ମିଳନୀରେ ସମସ୍ତ ଜିଲ୍ଲା ଏସପି ଡିସିପିଙ୍କ ସମେତ ସମସ୍ତ ବରିଷ୍ଠ ଅଧିକାରୀ ଯୋଗ ଦେଇଛନ୍ତି । ଜାନୁଆରୀ ୧ ତାରିଖରେ ଯୋଗ ଦେବାକୁ ଥିବା ନବ ନିଯୁକ୍ତ ଡିଜି ସୁନୀଲ କୁମାର ଵଂଶଲ ମଧ୍ୟ ଦିଲ୍ଲୀରୁ ଭର୍ଚ୍ଚୁଆଲ ମାଧ୍ୟମରେ ଯୋଗ ଦେଇଛନ୍ତି । ବରିଷ୍ଠ ପୋଲିସ ଅଧିକାରୀ ସମ୍ମିଳନୀରେ ରାଜ୍ୟର ବରିଷ୍ଠ ପୋଲିସ ଅଧିକାରୀଙ୍କୁ ବକ୍ତବ୍ୟ ରଖିବେ ହାଇକୋର୍ଟର ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ ମୁରଲୀଧର । ବରିଷ୍ଠ ପୋଲିସ ଅଧିକାରୀ ସମ୍ମିଳନୀରେ ପ୍ରଥମ ଥର ପାଇଁ ହାଇକୋର୍ଟର ମୁଖ୍ୟ ବିଚାରପତି ମତ ରଖିବାକୁ ଯାଉଛନ୍ତି। ପ୍ରଥମ ଦିନର ସମ୍ମିଳନୀରେ ଆଇନ ଶୃଙ୍ଖଳାର ସମୀକ୍ଷା, ଅପରାଧ ଓ ତଦନ୍ତ ସମ୍ପର୍କରେ ଆଲୋଚନା ହୋଇଛି।
ସେହିଭଳି ମାଓ ମୁକାବିଲା ରଣନୀତି, ନିଶାଦ୍ରବ୍ୟ ଚୋରା ଚାଲାଣକୁ ରୋକିବା ଓ କ୍ରାଇମ କ୍ରିମିନାଲ ଟ୍ରାକିଂ ନେଟୱାର୍କ ସିଷ୍ଟମ ସମ୍ପର୍କରେ ବିସ୍ତୃତ ଭାବେ ଆଲୋଚନା କରାଯାଉଛି। ସନ୍ଧ୍ୟା ସାଢେ ୭ ଟାରୁ ୮ ଟା ପର୍ଯ୍ୟନ୍ତ ମୁଖ୍ୟ ବିଚାରପତିଙ୍କ ୩୦ ମିନିଟର ବକ୍ତବ୍ୟ ଥିବାବେଳେ ଏହି ବରିଷ୍ଠ ପୋଲିସ ଅଧିକାରୀ ସମ୍ମିଳନୀରେ ମୁଖ୍ୟ ବିଚାରପତି କ'ଣ କହୁଛନ୍ତି ତାକୁ ସମସ୍ତଙ୍କର ଅପେକ୍ଷା ରହିଛି । ଉଦଯାପନୀ ଉତ୍ସବରେ ଭୁବନେଶ୍ବର ପୋଲିସ ଭବନରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇ ଉଦବୋଧନ ରଖିବେ ।
ବରିଷ୍ଠ ପୋଲିସ ଅଧିକାରୀଙ୍କ ସମ୍ମିଳନୀ ପାଇଁ ଅତିରିକ୍ତ ଡିଜି ଆଇନ ଶୃଙ୍ଖଳା ଆର.କେ ଶର୍ମାଙ୍କୁ ସଚିବ ଓ IG ଅପରେସନ ଅମିତାଭ ଠାକୁରଙ୍କୁ ଅତିରିକ୍ତ ସଚିବ ଦାୟିତ୍ବ ଦିଆଯାଇଛି । ଏହି ସମ୍ମିଳନୀରେ ଜିଲ୍ଲା SP, DSP, କମାଣ୍ଡାଣ୍ଟଙ୍କ ସମେତ ଗୁଇନ୍ଦା ବିଭାଗ, ଜେଲ ବିଭାଗ, ଅଗ୍ନିଶମ ବିଭାଗ, ଭିଜିଲାନ୍ସ ଓ ରେଲୱେ ପୋଲିସର ଅଧିକାରୀ ମାନେ ଯୋଗ ଦେଇଛନ୍ତି । ରାଜ୍ୟର ଆଇନଶୃଙ୍ଖଳା ସ୍ଥିତି, ସାଇବର ଅପରାଧ, ସଂଗଠିତ ଅପରାଧ, ନିଶା କାରବାର ସମେତ ଆଗାମୀ ପଞ୍ଚାୟତ ଓ ପୌର ନିର୍ବାଚନ ପରିଚାଳନା ନେଇ ଏହି ସମ୍ମିଳନୀରେ ଆଲୋଚନା ଓ ଆକ୍ସନ ପ୍ଲାନ ପ୍ରସ୍ତୁତ ହେବାର ଯୋଜନା ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
