କଟକ: ଡଗରପଡାରେ ବୋମାମାଡ଼ ଘଟଣାରେ 3 ଜଣଙ୍କୁ ଗିରଫ କରିଛି ଲାଲବାଗ ଥାନା ପୋଲିସ । ଗିରଫ ମୁଖ୍ୟ ଅଭିଯୁକ୍ତ ଦୁର୍ଦ୍ଦାନ୍ତ ଅପରାଧୀ ହାଡିଆ ଓରଫ ପ୍ରକାଶ ବେହେରା । ହାଡିଆ ସହ ପୋଲିସ ତାର 2 ସହଯୋଗୀଙ୍କୁ ମଧ୍ୟ ବାନ୍ଧିଛି । ସେମାନଙ୍କ ନିକଟରୁ ଗୋଟିଏ ଜୀବନ୍ତ ବୋମା, 2ଟି ମୋବାଇଲ ଫୋନ ସହ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି ।
ସୂଚନାଯୋଗ୍ୟ, ଗତ 21 ତାରିଖରେ ଡଗରପଡା ଅଞ୍ଚଳରେ ବୋମାମାଡ଼ ହୋଇଥିଲା । ଏହି ବୋମାମାଡରେ କୌଣସି କ୍ଷତି ହୋଇନଥିଲେ ମଧ୍ୟ ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ବୋମାମାଡ଼ ହୋଇଥିଲା । ବୋମାମାଡ଼ କରି ଦୁର୍ବୃତ୍ତମାନେ ଫେରାର ହୋଇଯାଇଥିଲେ । ଲାଲବାଗ ଥାନା ପୋଲିସ ଘଟଣାର ଛାନଭିନ କରିଥିଲା । ତଦନ୍ତ ବେଳେ ବୋମା ମାଡରେ ହାଡ଼ିଆର ସମ୍ପର୍କ ଥିବା ପୋଲିସ ଜାଣିବାକୁ ପାଇଥିଲା ।
ଗିରଫ ପରେ ହାଡ଼ିଆର ଥିବା ଏକ ମଦ ଦୋକାନକୁ ସିଜ୍ କରିଛି ପୋଲିସ । ତେବେ ତା' ବିରୋଧରେ ବିଭିନ୍ନ ଥାନାରେ 20ରୁ ଅଧିକ ମାମଲା ରହିଥିବା କଟକ ଡିସିପି କହିଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
